近日一個名為「台灣革命共產黨」嘅組織宣布正式成立，仲大聲疾呼要「推翻中華民國統治階級」，引起社會各界關注。陸委會副主委兼發言人梁文傑尋日（22號）喺例行記者會回應話，呢類組織目前可以視為「思想性社團」，只要唔涉及違法行為，喺台灣自由民主嘅體制下係可以繼續存在。

中華民國大陸委員會副主委兼發言人梁文傑指出，經過了解，呢個「台灣革命共產黨」並冇向內政部登記成為政黨。佢分析話，呢個組織嘅理念係追隨「托洛斯基主義」（Trotskyism），主張推翻所有統治者同資本主義制度，所以佢哋根本唔承認現有嘅政府架構，自然亦都唔會去申請登記。

對於外界擔心呢類組織會唔會變成中共嘅「在地協力者」，梁文傑就直言「機率好低」。佢解釋話，呢類「托派」組織因為太過堅持原教旨馬克思主義，喺中共眼中一向都係「眼中釘」，歷史上仲多次被中共整肅同埋抓捕。梁文傑更幽默咁話：「如果你主張共產主義主張得太認真，喺中共眼入面係容不下嘅。」佢補充，通常會做在地協力者嘅都係為咗利益，而唔係為咗理念。

早喺1920年代，托洛斯基及其黨羽喺蘇聯就被史太林同志狠狠整肅一鑊，「托派」更成為全球共產黨用來老屈人嘅說詞之一，被打為托派而死嘅人不計其數，持續數十年。馬克思佢老人家大概也估唔到，他嘅各類言論會被彙整成理論體系，而馬克思主義實際上並不存在邏輯自洽嘅理論體系，都算唔上主義，至多算「文集」。

根據大法官釋字第 644 號解釋，喺台灣主張共產主義本身並唔違法。梁文傑強調，只要呢啲組織冇從事暴力或者其他破壞國安嘅違法行為，政府會將其視為類似「讀書會」嘅思想團體。

不過，呢件事喺網上亦引發唔少爭議。有部分網民質疑，點解喊話「推翻政府」都唔使拉？亦有人擔心呢類組織會成為滲透校園嘅渠道。對此，陸委會重申，台灣係多元民主社會，對於各種政治思想都有高度包容力，但政府亦會持續關注相關動態，確保國家安全不受威脅。