全球首富馬斯克同歐洲廉航霸主、瑞安航空 (Ryanair) 行政總裁奧利里 (Michael O’Leary) 近日爆發一場精彩嘅「隔空罵戰」。事緣瑞安航空拒絕在佢地嘅機隊安裝馬斯克旗下嘅 Starlink 衛星上網系統，惹來馬斯克不滿，不僅喺社交平台 X 公審對方係「白癡」，更發起公投揚言要「買起成間瑞安航空」。面對收購威脅，一向言論出位嘅奧利里不但無驚，反而借勢「抽水」，感謝馬斯克帶挈機票銷量上升，更順勢推出「白癡大減價」回敬對方。

這場富豪口水戰嘅導火線，源於奧利里早前接受訪問時，直言拒絕為瑞安航空機隊引入 Starlink。奧利里解釋，喺飛機上安裝 Starlink 天線會增加機身重量同風阻，估計會令燃料成本每年增加 1.5 億至 2.5 億歐元。佢更死守廉航原則，指乘客喺短途機上根本唔會願意畀錢上網，若果免費提供又會蝕本，所以斬釘截鐵話：「我完全唔會理馬斯克講乜，佢係好有錢，但佢依然係個白癡 (Idiot)。」

呢番言論隨即觸動咗馬斯克嘅神經。馬斯克隨即喺 X 平台反擊，指奧利里嘅數據「錯到離譜」，聲稱 Starlink 天線對燃料消耗嘅影響微乎其微，更嘲諷對方係「徹頭徹尾嘅白癡」(Utter idiot)，認為瑞安航空應該要炒咗佢。

罵戰隨即升級，馬斯克發揮其「鍵盤戰士」本色，喺 X 上發起投票，問網民：「我應唔應該買起瑞安航空，並搵個真係叫 Ryan 嘅人做老細？」結果引來超過 90 萬網民投票，當中近八成人贊成馬斯克「科水」收購。馬斯克更講笑話要恢復 Ryan 家族嘅「正統統治」，充滿挑釁意味。

雖然馬斯克身家豐厚，買起市值約 300 億歐元嘅瑞安航空綽綽有餘，但市場分析普遍認為這只係佢一貫嘅「口爽」作風。事實上，受限於歐盟法規，歐盟以外嘅投資者不能持有歐盟航空公司超過 50% 股份，這意味著持美國籍嘅馬斯克根本難以全面收購總部位於愛爾蘭嘅瑞安航空。

面對馬斯克嘅收購威脅同網上圍攻，奧利里展現出教科書級嘅「公關手段」。佢周三 (22日) 喺都柏林召開記者會，一開口就話要「衷心感謝」馬斯克。

奧利里笑稱：「多得馬斯克喺 X 係咁鬧我，令瑞安航空嘅曝光率大增，過去幾日機票預訂量更加升咗 2% 到 3%。」佢形容只要唔涉及航空安全，任何罵戰都係免費廣告。為咗進一步「抽水」，瑞安航空隨即宣佈推出「大白癡機票優惠」(Great Idiots Seat Sale)，推出 10 萬張低至 16.99 歐元 (約 140 港元) 嘅機票，宣傳口號仲寫明：「專為馬斯克同 X 上面其他白癡而設！快啲買，手快有手慢無！」

對於馬斯克嘅收購論，奧利里亦不忘補刀，嘲諷馬斯克：「佢對於航空擁有權法規嘅認識，仲少過佢對空氣動力學嘅認識。」佢更形容 X 平台係「糞坑」(Cesspit)，但坦言為咗生意，瑞安航空依然會繼續喺上面宣傳，實行「又要鬧又要用」。

這場罵戰目前看似由奧利里嘅「自嘲式營銷」稍佔上風，不僅慳返筆廣告費，仲成功將網絡熱度轉化為實際生意。