加拿大總理卡尼剛剛結束咗佢任內首次嘅訪華行程，呢次出訪唔單止係「握手影相」咁簡單，仲帶返嚟一份大禮——被中國封殺咗幾年嘅加拿大牛肉，終於獲准解封，即將重返中國市場！

事隔幾年，中加關係一度跌至冰點，但隨著卡尼上個禮拜親自飛抵北京，同中國國家主席習近平及總理李強會面後，局勢出現咗戲劇性嘅轉機。加拿大農業部長麥唐納 (Heath MacDonald) 證實左，中國已經正式解除對加拿大牛肉嘅進口禁令。

大家可能仲記得，2021年12月，因為亞伯達省 (Alberta) 發現咗一宗「非典型瘋牛症」個案，中國隨即落閘，全面暫停進口加拿大牛肉。呢一封就封咗足足四年幾。對於加拿大牛農嚟講，中國係佢哋數一數二嘅大客，呢幾年可謂損失慘重。加拿大養牛協會 (Canadian Cattle Association) 會長富爾頓 (Tyler Fulton) 收到消息後直言「飲得杯落」，形容呢個係多年遊說嘅成果，業界終於見到曙光。

除咗牛肉，另一項受矚目嘅農產品芥花籽油 亦傳來好消息。據報中方承諾會喺今年3月前，將加拿大油菜籽嘅綜合關稅由現時高得驚人嘅約84%大幅下調至約15%。仲要係卡尼前腳剛走，中國進口商就即刻大手掃貨，買入咗6萬噸加拿大油菜籽，係舊年10月以來嘅首宗交易。呢啲真金白銀嘅訂單，比起任何外交辭令都更加實際。

點解中加關係會喺呢個時候突然「回暖」？背後其實離唔開一個熟悉嘅名字，美國總統特朗普 。

隨著美國嘅貿易保護主義抬頭，特朗普動不動就揮舞關稅大棒。加拿大作為美國嘅鄰居兼盟友，日子一啲都唔好過。卡尼政府明顯意識到，將所有雞蛋放喺美國呢個籃度太過危險，必須要搵「Plan B」。

卡尼今次訪華，明確提出要開啟中加關係嘅「新時代」，更同中方簽署咗一系列關於能源、打擊犯罪同食品安全嘅備忘錄。佢喺北京期間強調，面對全球分裂同混亂，中加合作可以成為世界嘅榜樣。好明顯，加拿大係想透過加強同中國嘅經貿聯繫，去抵銷來自美國嘅經濟壓力，實行「兩條腿走路」。

結束訪華行程後，卡尼馬不停蹄轉飛瑞士達沃斯 (Davos) 出席世界經濟論壇。雖然佢喺演講入面無直接點名特朗普 或者俄羅斯總統普京，但佢狠狠批評有啲「大國」放棄咗戰後嘅自由貿易規則，企圖將地球劃地為王。佢呼籲全球嘅「中等強國」要結盟，捍衛自己嘅利益。呢番說話，聽落似係講畀全世界聽，其實更似係講畀南邊嗰位鄰居聽。