中國電商巨頭拼多多（PDD Holdings）旗下嘅跨境平台 Temu，喺海外再遇重創。一直以「平到笑」策略橫掃全球嘅 Temu，今次喺土耳其踢到鐵板。根據最新消息，土耳其競爭委員會（Rekabet Kurumu）嘅官員喺剛過去嘅星期三，即係2026年1月21日，毫無預警咁「踩上門」，突擊搜查 Temu 位於伊斯坦堡嘅辦公室。呢單嘢唔單止令當地員工嚇到鼻哥窿都無肉，更加顯示出全球各國對於中國電商「頂爛市」嘅容忍度已經達到新低。

成件事發生得相當突然，Temu 方面事後向傳媒證實，話當局嘅行動完全係意料之外，事前無收到任何風聲，殺佢哋一個措手不及。不過，最耐人尋味嘅係雙方對於搜查細節嘅講法出現咗「羅生門」。Temu 嘅發言人聲稱，執法人員喺行動期間帶走咗公司嘅手提電腦同部分電腦設備，似乎係想蒐集內部數據同通訊紀錄；但轉個頭，土耳其競爭委員會就出嚟否認，話「帶走電腦」嘅講法唔係事實。呢種各執一詞嘅情況，更加令外界懷疑當局今次行動背後，係咪掌握咗 Temu 一啲更敏感嘅違規證據，所以先至要即刻封鎖現場蒐證。雖然當局強調今次「現場視察」唔代表已經正式立案調查，但係人都知，無風不起浪，呢種突擊檢查通常都係大案爆發前嘅先兆。

其實 Temu 喺土耳其「無運行」並唔係一朝一夕嘅事。自從 Temu 喺2025年6月因為當地法規壓力，被迫喺土耳其設立實體辦公室同委任法律代表之後，佢哋就一直俾人睇實。Temu 憑住強大嘅物流網絡同補貼戰術，短短一年間喺土耳其嘅月活躍用戶由700萬暴升到2,900萬，個勢簡直係想吞咗成個市場，直接威脅到當地電商龍頭 Hepsiburada 嘅生存空間。土耳其政府見到自己人俾中共打到殘，當然唔會袖手旁觀。早喺2024年8月，土耳其政府已經出咗狠招，將海外網購嘅免稅門檻由150歐元大幅劈到落30歐元，擺明就係針對 Temu 同 Shein 呢類主打平價小包裹嘅平台。去到2025年尾，政府更加係加強執法，連運費都要計埋入稅基，務求令 Temu 嘅價格優勢蕩然無存。

今次土耳其出手，其實只係全球圍剿中國電商嘅縮影。睇返轉頭，歐盟（EU）果邊嘅火頭一樣燒得好猛。歐盟委員會早喺2025年7月就初步認定 Temu 違反咗《數碼服務法》（Digital Services Act），指控佢哋個平台充斥住大量唔符合歐盟安全標準嘅非法產品，例如危險嘅BB玩具同電子垃圾。歐盟甚至質疑 Temu 嘅演算法有令人上癮嘅設計，專門引誘消費者不斷買嘢。除咗歐洲，印尼政府亦都因為驚本地中小企俾 Temu 嘅平價貨打死，直接出禁令封殺。可以話，Temu 依家係面臨緊「八國聯軍」式嘅監管壓力，邊度都無得避。

受到呢單突擊搜查消息影響，拼多多嘅股價即時有反應，一度跌咗超過2%。市場依家最擔心嘅係，土耳其今次行動會唔會引起連鎖反應，令其他國家嘅監管機構有樣學樣，採取更激進嘅突擊搜查手段來獲取證據。雖然 Temu 官方口口聲聲話會「全力配合」當局調查，但係面對住土耳其政府為保就業、保本地企業而築起嘅貿易壁壘，加上全球對於數據安全同產品合規嘅要求越黎越高，Temu 想要好似以前咁靠燒錢同低價策略去搶佔市場，恐怕支歌仔已經無咁易唱。