日圓跌到「殘」，去日本旅行平過喺香港食餐飯，但係最新數據顯示，原來有一班人正在「逆市」減少去日本。日本國土交通省剛剛公佈咗2025年嘅全年旅遊成績表，結果就喺中國旅客大幅減少嘅情況下，日本全年外國遊客竟然衝破4,270萬人次，再次破晒歷史紀錄！

事情嘅導火線，要由日本首相高市早苗 (Sanae Takaichi) 去年11月講嘅一句說話講起。當時佢重提「台灣有事即日本有事」，呢句說話即刻觸動咗北京嘅神經，引發外交風波。隨後中國官方呼籲民眾「避免前往」，再加上各大航空公司好配合咁削減飛往日本嘅航班，結果立竿見影。

根據最新數據，單係去年12月，中國訪日遊客數量就比前年同期暴跌咗45%，跌到得番約33萬人。以往喺銀座、心齋橋見到中國遊客「爆買」掃貨嘅場面，而家已經少咗好多。對於日本零售業，特別係依賴中國客嘅免稅店黎講，呢個冬天真係特別凍，12月嘅銷售額即刻見紅。

不過，最神奇嘅係，雖然無咗大批中國客，日本嘅總體遊客數字唔單止無跌，反而升到彭彭聲！2025年全年入境人數達到4,270萬，比2024年嘅3,700萬仲要多，甚至第一次衝破4,000萬大關。

到底係邊個填補咗呢個「缺口」？答案就係歐美同澳洲客。受惠於日圓匯率持續低迷，對於揸美金、歐羅嘅遊客黎講，日本簡直係「平靚正」嘅天堂。再加上南韓同台灣遊客繼續將日本當成「後花園」，去完又去，令到整體數字完全無受中國客減少影響。

日本國土交通大臣金子恭之就好坦白咁話，雖然12月中國客少咗，但係來自美國、歐洲同澳洲嘅遊客增長「足以彌補缺口」。不過佢都留番一線，話「會盡力確保想黎日本嘅中國民眾可以盡快成行」，始終打開門做生意，無人會嫌客多嘅。

遊客多到爆棚，對於日本當地居民黎講就未必係好事。京都嘅「舞妓騷擾」事件、富士山便利店外嘅「黑幕」封路，依然係大家熱議嘅話題。為咗應對過度旅遊 (Overtourism)，日本政府已經出招，包括對攀登富士山嘅遊客收費同設限額。

雖然中國客少咗，但係隨著歐美客湧入，加上佢地比起亞洲客更鍾意深度遊、去鄉郊地區，相信未來日本嘅「人擠人」問題只會轉移陣地，未必會咁快解決。對於各位即將出發「返鄉下」嘅香港朋友，訂酒店個陣可能都要有心理準備，房價隨時又創新高。