隨着中美角力由貿易、科技延伸至情報領域，美國中央情報局（CIA）近期再度發力。繼舊年針對俄羅斯同伊朗推出招募行動後，CIA 喺今年1 月中旬再次針對中國市場，喺各大社交平台發布全新嘅簡體中文宣傳片，公然呼籲對現狀不滿嘅中國政府官員或各界精英提供情報。

今次 CIA 發布嘅影片長約兩分鐘，製作水平被網民戲稱為「荷里活級數」。影片全程以文字呈現，詳細列出咗九個所謂嘅「安全聯繫步驟」。根據 CIA 官方網站同社交媒體最新發布嘅資訊，美方為潛在「線人」提供咗一套極為細緻嘅技術操作流程，旨在避開現代化嘅數位監控。

呢套「九大步驟」包括：設備隔離，建議不要使用任何與個人身份掛鉤嘅現有設備，如日常用嘅手機或電腦。現金交易，購買全新或二手嘅電子設備時，必須使用現金或禮品卡，避免留下銀行轉賬紀錄。網絡隱匿，強烈建議使用 VPN或 Tor（暗網瀏覽器）進行初步聯繫，並使用公共Wi-Fi以減少追蹤風險。身份空白，在註冊任何聯絡帳戶（如加密電郵）時，切勿填寫真實姓名、電話或任何可識別身份嘅資料。單線聯繫，一旦提交情報，必須立刻刪除所有紀錄，並靜候美方透過指定渠道回覆，強調「唔好重複聯繫」。

CIA 現任局長雷格里夫（John Ratcliffe）公開表示，招募能協助竊取機密嘅情報資產係 CIA 嘅核心任務。佢更直言：「如果呢啲片無效果，我哋就唔會繼續整。」顯示美方對呢種「網上招兵買馬」嘅策略頗有信心。

今次招募行動嘅重點對象顯然係中國內部嘅公務員、軍方人士同埋科技精英。影片內容唔單止講錢，仲大打心理戰。其中一段短片描繪一名高級官員因為見到身邊同事「被消失」而感到不安，最終決定聯繫美方以「主宰自己嘅命運」。

分析人士指出，CIA 係想利用中國內部反腐行動帶來嘅壓力，以及部分官員對政策走向嘅不滿，引誘佢哋成為「線人」。美方表示，佢哋唔單止想要軍事情報，對中國嘅經濟政策、外交秘密以及尖端科技資訊都「好有興趣」。

目前呢段招募影片喺 X、YouTube 同 Telegram 等平台已經有超過數百萬次觀看。雖然外界對實際成效存疑，但無疑反映出中美情報戰已經進入「半公開化」同「數位化」嘅新階段。無論成效，相信喺人人自危嘅中共內部，點都起到心理戰嘅效果。