新民黨嘅陳家珮，今屆成功接棒葉劉淑儀連任立法會議員。佢話，未來從政會承傳葉劉一路以來嘅政治精神同作風，不過就唔會跟隨葉太向網民派「福利」。而葉劉就形容自己兩次參選特首都係「愚蠢」（foolish）嘅決定，因為當時「唔信邪」，明知爭取唔到中央支持。

陳家珮形容，葉劉淑儀由港英年代做到「愛國者治港」時期，幾乎就係一本活生生嘅香港政治歷史書。佢話，葉劉淑儀教得佢最深嘅一樣嘢，就係一定要走入群眾，建立親民形象，真真正正落區同市民接觸。佢直言，從政嘅人，就算議政能力幾強，如果唔識同市民打交道，都好難做好份工作。

至於會唔會延續葉劉淑儀以往向網民派「福利」嘅做法，陳家珮就話暫時冇呢個打算，就算將來真係做，都會用唔同形式。佢笑言，葉劉淑儀對揀景、着衫同形象經營有一套獨特品味，但自己坦白講，冇呢方面嘅天份。

葉劉淑儀任內帶領新民黨推動過唔少議題，其中一樣同其他建制政黨較唔同嘅，就係支持同性伴侶關係登記。陳家珮重申，新民黨立場冇變，雖然唔支持同性婚姻，但認為應該保障同性伴侶嘅基本權利。

佢話，如果將來政府再一次將相關法例提交立法會，新民黨都會支持，特別係契約伴侶安排方面，只要政府研究後認為可行，黨內相信都會投贊成票。

另一方面，立法會前議員、新民黨主席葉劉淑儀，曾經喺2012年同2017年兩度參選行政長官，但都因為攞唔到足夠提名而退選。佢早前接受商台節目主持陳志雲訪問時，形容自己兩次參選特首都係「愚蠢」（foolish）嘅決定，因為當時「唔信邪」，明知爭取唔到中央支持，仲照樣去拉票，結果徒勞無功，形容係「自己攞嚟辛苦」。

由陳志雲同前立法會議員江玉歡主持嘅節目《又係時候同一天講再見》，喺周一（19日）深夜首播，接替播咗超過22年嘅時事清談節目《光明頂》。節目首集上半部分，播出陳志雲專訪葉劉淑儀，葉劉再一次回顧自己兩次參選特首嘅經歷，直言「選本身冇問題，但撞正好強勢嘅對手，自己攞嚟辛苦，仲連累同事一齊辛苦」。

葉劉淑儀喺節目入面坦言，做行政長官一定要有中央支持，冇嘅話根本就係徒勞無功，呢個係政治現實。佢話，《基本法》寫得好清楚，特首要由中央委任，仲有全面管治權，而佢當年正正就係未得到中央支持。佢承認，雖然心知機會唔大，但仍然想「博吓」，直到確定冇可能成功，就提早收隊，形容呢個係學識接受現實。

佢又提到，家人對佢參選唔係完全理解，笑言個女不停問佢「做嚟做乜」。不過，佢話自己一早有心理準備，因為特首得一個位，唔係贏就輸，輸咗都係照樣返立法會返工，最多面色差啲，外界多數都係同情，唔會笑你。

葉劉淑儀又話，每一次參選對佢嚟講都係寶貴經驗，包括點樣應付傳媒，每選一次知名度亦都高一次。至於將來會唔會繼續做行政會議工作，佢話要睇身體狀況同埋下任行政長官係邊個，但只要能力許可，仍然願意服務香港。