美國總統特朗普近日就中期選舉嘅去向發表言論，引起華盛頓政壇高度關注。佢日前接受路透社訪問時講到，認為所屬嘅共和黨「做得好成功」，甚至暗示美國未必有需要舉行中期選舉，有關講法即時引起外界揣測。

早前喺一場共和黨人集會上，特朗普亦曾警告，如果共和黨喺11月嘅中期選舉失利，佢本人可能會面臨被彈劾嘅風險。其後有傳媒引述消息指，特朗普或有意用非常手段應對選舉結果，包括宣布戒嚴，從而阻止中期選舉舉行。

白宮方面其後作出澄清。白宮發言人萊維特回應記者提問時表示，總統嘅相關言論只係開玩笑，並非認真考慮取消選舉。佢話，特朗普只係用比較誇張、滑稽嘅方式形容政府施政方向，強調現屆政府正做緊美國人民想要嘅嘢。

美國有線新聞網絡報道指出，特朗普其實亦好清楚，按過往經驗，在任總統所屬政黨喺中期選舉中，好少會增加國會議席。一旦眾議院重新由民主黨控制，政府日後嘅開支同撥款安排，將需要民主黨支持，而對方亦有權依法調查特朗普政府。

法律層面方面，報道指選舉日期係由法例規定，理論上國會可以更改選舉日，但並唔可以取消選舉。選舉事務屬於各州自行管理，若果發生重大災難，各州州長同立法機構可以更改本州嘅投票日期，但目前仍然冇相關先例。而總統本人，亦冇權單方面延遲或者取消選舉。

霍士新聞就引述美國電視節目主持人貝阿爾話，特朗普可能希望，針對移民部門執法行動嘅抗議示威引發混亂，從而為宣布戒嚴製造藉口，最終達致取消中期選舉嘅目的。參議院民主黨領袖舒默回應時直言，特朗普向來會不擇手段，批評佢冇信用、亦唔尊重法治，並表示民主黨方面已經準備好，應對特朗普可能干預中期選舉嘅情況。