美國總統特朗普指責八個歐洲國家派遣軍隊前往格陵蘭，表示會對相關國家加徵新一輪關稅，直至「達成完全出售格陵蘭島嘅協議」。歐洲多個國家正私下研究一系列反制方案，當中包括對總值約930億歐元嘅美國貨品加徵關稅，甚至考慮限制美國企業進入歐盟市場。不過，路透社就引述歐盟外交官消息報道，歐盟暫時唔打算即時啟動反制措施，仍會優先透過外交途徑，嘗試化解同美國之間嘅貿易爭端。

有關官員未有透露擬議中嘅關稅稅率，只表示相關措施仍然處於研究同評估階段，強調現階段嘅重點，係為歐洲多國領袖今個星期同美國總統特朗普會面時，提供更多談判籌碼。消息亦指出，如果雙方未能喺2月1號之前達成共識，或者美國如期落實關稅措施，歐盟嘅反制關稅就會喺2月6號自動生效。

歐盟委員會主席馮德萊恩就事件向美國發出警告，指關稅措施唔單止會嚴重損害跨大西洋關係，更可能引發一個高度危險嘅惡性循環。丹麥首相弗雷澤里克森同德國總理默茨、法國總統馬克龍同英國首相施紀賢進行緊急會談後表示，丹麥王國對歐洲各國發出一致而清晰嘅訊息感到欣慰，強調歐洲唔會屈服於任何形式嘅脅迫。

英國方面嘅表態尤其引人注目。面對特朗普嘅關稅威脅，唐寧街罕有提高聲調，直言以關稅作為手段，企圖強行吞併丹麥自治領土格陵蘭島，係「完全不可接受」嘅行為。首相施紀賢亦被指，對過往對美國總統採取相對克制、退讓嘅態度愈來愈不滿，並希望盡快劃清界線。

法國政壇方面，無論左翼、中間派定右翼，周日罕見地一致譴責特朗普最新言論，反對佢以關稅作為施壓工具，懲罰反對美國吞併格陵蘭島嘅國家。有法國政界人士直言，歐洲唔可以對呢種令人不安嘅世界秩序想像視而不見，亦有人形容，呢個係「不可容忍嘅脅迫行為」。

法國總統馬克龍喺周日清晨表示，如果特朗普落實加徵關稅嘅計畫，佢會要求歐盟即時啟動「反脅迫機制」。呢套機制被外界形容為歐盟嘅「經濟核武器」，正式啟動需要獲得歐盟多數成員國表決通過，其措施包括凍結相關企業進入歐洲公共市場嘅資格，或者阻止特定投資項目。

歐盟27國駐布魯塞爾大使周日下午就特朗普嘅關稅威脅舉行緊急磋商。雖然會後預料唔會即時發表聲明，但會議主要目的係交換意見，評估美國總統一連串言行所引發嘅政治同經濟衝擊。

正在首爾訪問嘅意大利總理梅洛尼表示，已經同特朗普通話，並當面向對方表明，以關稅作為威脅係一個「錯誤之舉」。丹麥外交大臣拉斯穆森就警告，特朗普嘅行動正令「我哋所熟知嘅世界秩序」同北約嘅「未來」同時面臨風險，但佢強調，丹麥對歐洲嘅團結同支持，從來冇動搖過。

丹麥、芬蘭、法國、德國、荷蘭、挪威、瑞典同英國其後發表聯合聲明指出，關稅威脅正嚴重破壞跨大西洋關係，各國會繼續保持團結，同步應對，並重申有決心捍衛自身主權。

法國農業部長安妮．熱內瓦爾周日指出，特朗普最初將關稅視為經濟工具，但而家已經明顯變成脅迫手段。法國經濟部長萊斯庫爾周一前往柏林，同德國同僚會面，商討就啟動反脅迫機制協調立場。去年7月，馬克龍曾經提議就美國加徵附加關稅啟動該機制，但當時未獲德國支持；而家法國政府相信，柏林嘅立場正逐步向法方期望方向靠攏。

德國機床同工業設備供應商協會亦喺周日公開呼籲歐盟果斷動用反脅迫工具。協會主席貝特拉姆．考拉特喺聲明中警告，如果歐盟今次讓步，只會助長美國總統提出下一個荒謬要求，並再以新一輪關稅作威脅。

除咗反脅迫機制之外，歐盟27國仲有另一個選項，就係重新啟動針對約930億歐元美國貨品嘅報復措施。呢項措施喺2025年7月，因歐盟同美國達成一項被形容為「屈辱性」嘅協議而暫停。該協議被批評嚴重失衡，規定歐洲出口至美國嘅貨品要繳付15%關稅，鋼鐵同鋁產品就維持高達50%稅率；相反，歐洲承諾取消對美國工業品同農產品徵收嘅所有關稅。歐盟當時認為，接受呢啲條件，係為咗換取華盛頓繼續介入烏克蘭事務，以及維持同美國之間「穩定同可預測」嘅貿易關係。

有關協議原定喺未來幾日交由歐洲議會審議。不過，一直採取觀望態度、希望保留更多談判空間嘅議員，因特朗普針對格陵蘭嘅威脅而改變立場。歐洲議會右翼領袖、德國籍嘅曼弗雷德．韋伯直言，喺目前情況下，根本唔可能批准該協議。歐洲議會最大黨團人民黨內嘅自由派亦表態指，「現階段我哋無法投票支持通過呢項協議」。