台灣橋頭地檢署喺剛過去嘅週末採取突擊行動，拘捕咗台灣親中媒體中天新聞嘅著名記者兼主播林宸佑 ，同埋另外5名現役及退役軍人。當局指控佢哋涉嫌收受中國大陸資金，刺探軍事機密，全案正朝違反《國安法》同《貪污治罪條例》方向偵辦。呢單嘢唔單止係軍方洩密，更加係首次有知名電視台記者直接捲入「共諜案」，情節相當令人嘩然！

講起林宸佑，佢喺台灣政治新聞界有個花名叫「追問哥」，畢業於國立政治大學新聞系，以前做實習記者嗰陣就因為大膽圍堵政治人物而成名，後尾入咗立場鮮明嘅中天新聞做主播，專跑立法院同政治線。

但鏡頭前嘅「正義之聲」，鏡頭後懷疑做緊另一種「生意」。根據檢方掌握嘅線索，林宸佑涉嫌充當「中間人」，利用職務之便接觸軍方人員。案情透露，佢唔係用咩高科技手段，而係用最老土但最有效嘅方法「派錢」。據報佢每次出手幾千到幾萬新台幣不等，利誘嗰啲手頭緊或者意志薄弱嘅現役軍人，叫佢哋交出軍事機密資料，再透過渠道轉交俾所謂嘅「中國大陸人士」。

檢察官認為林宸佑同嗰5名軍人有串供同滅證嘅風險，所以向法院聲請羈押禁見，法院已經批准咗。平日追問人哋有無隱瞞嘅林主播，依家自己就要面對檢察官嘅通宵拷問。

其實呢單案唔係突然爆出嚟嘅，背後係檢方「放長線釣大魚」嘅結果。成件事嘅源頭，要追溯到舊年11月爆出嘅一單「拍片投誠案」。

當時有一名海軍陸戰隊嘅陳姓中士，俾人發現為咗賺取區區20萬新台幣（約5萬港幣），竟然著住軍服、拎住五星旗，拍片向中國宣誓效忠，仲高叫「台灣係中國嘅」。檢方順藤摸瓜，發現背後有個網名叫做「吉祥」嘅中國大陸接頭人。調查人員一直mon住條線，結果越查越深，發現呢個滲透網絡唔單止有基層士兵，竟然仲牽涉到媒體圈嘅林宸佑。

目前為止，成個系列案已經發動咗四波搜索，累計有超過10名軍人被收押。檢方形容，呢個已經唔係單一嘅士兵違紀，而係有組織、有系統嘅滲透行動。

對於自家招牌記者被捕，中天新聞隨即發表聲明「割席」。佢哋話公司對案情「毫無所悉」，強調之前傳聞話中天電視台大樓被搜索係「假消息」，只係林宸佑嘅私人住所被搜。聲明最後仲加咗句「天佑台灣」，呼籲司法勿枉勿縱。

不過，外界嘅質疑聲音就無咁易平息。有分析指出，記者因為跑新聞，同軍方人員熟絡係常事，但如果將呢種「人脈」變成「買賣」，界線就非常模糊。特別係中天新聞一直以來嘅政治立場都備受爭議，今次事件無疑令佢哋嘅公信力再受重創。

有軍事專家分析，以前中共對台滲透多數係搵退役將領，貪佢哋有影響力；但近年發現搵現役基層士兵、甚至媒體記者「性價比」更高。士兵缺錢、記者有計傾，好容易就攻破心防。今次林宸佑被捕，顯示北京嘅情報網已經滲透到台灣社會嘅「毛細血管」，連掌握話語權嘅傳媒人都成為咗棋子。