中國國家統計局周一（19日）公布最新人口統計數據，顯示人口下滑趨勢進一步惡化。截至去年年底，全國人口為14.0489億人，按年減少339萬，已經連續第四年錄得人口負增長，跌幅亦明顯快過前年。全年出生人口只得792萬人，出生率跌至5.63‰，創下1949年以來最低紀錄。長期研究中國人口問題嘅學者易富賢指出，單靠行政鼓勵生育政策，無法扭轉大勢；如果真係要改變，必須牽涉政治模式同政治經濟體制嘅根本調整。

有關人口數據涵蓋31個省、自治區、直轄市以及現役軍人，不包括居住於內地嘅境外人士。去年全年死亡人口達1,131萬人，較前一年嘅1,093萬人再度上升，人口死亡率為8.04‰，自然增長率跌至負2.41‰，反映人口萎縮已成為長期、結構性問題。

從性別結構睇，男性人口為7.1685億，女性人口為6.8804億，整體性別比為104.19，即每100名女性對應約104名男性。年齡結構方面，16至59歲人口為8.5136億，佔全國人口60.6%；60歲或以上人口增至3.2338億，佔比達23%，其中65歲以上人口達2.2365億，佔全國人口15.9%，老齡化速度持續加快。

城鄉結構方面，去年城鎮常住人口增至9.538億人，按年增加1,030萬；鄉村常住人口則跌至4.5109億人，按年減少1,369萬人。全國城鎮化率升至67.89%，較前年提高0.89個百分點。教育程度方面，16至59歲人口平均受教育年限達11.3年，較前年略有上升。

易富賢指出，2026年係中國廢除獨生子女政策十周年。曾經主導計畫生育工作數十年、甚至一度主張實行「百年計畫生育」嘅彭珮雲，已於2025年12月21日離世，終年96歲。如今，佢被部分官方敘事重新包裝成「改革派」，卻毋須為政策造成嘅深遠後果承擔任何責任，亦引發社會對一項被廣泛視為不人道政策，點解可以延續長達35年嘅根本質疑。

易富賢表示，1979年時任國務院副總理陳慕華提出獨生子女政策，並獲得陳雲、鄧小平等高層支持。1980年，《人民日報》刊登由導彈專家宋健等人撰寫嘅文章，預測中國人口將於2080年暴增至42.6億，進一步鞏固當局推行獨生子女政策嘅決心。由於全國人大內部對政策存在保留，認為屬過渡性措施，最終政策未有經全國立法通過，而係透過一封「公開信」方式推行。

喺胡耀邦同趙紫陽支持下，二孩政策曾於1985年喺部分地區試行。不過，1989年後政治氣候急轉，宋健成功說服時任國家主席江澤民重新收緊生育政策。到1991年，當生育率已跌破更替水平，本應逐步退出獨生子女政策，惟計生系統反而進一步加碼，將源自湖南嘅「一票否決權」制度推廣至全國，將計畫生育績效同官員升遷掛鈎，令生育率由1990年嘅2.3，急跌至1995年嘅1.43，並喺2000年再降至1.22。

易富賢分析指出，中國過去能夠成為全球主要經濟體，關鍵在於年輕人口所帶來嘅「人口紅利」。但自2012年起，勞動力人口已經開始減少，經濟增速亦同步下行。官方公布增長率約為5%，但實際情況可能更低。隨住人口迅速老化，中國喺2029年至2035年間，幾乎所有人口指標都會比美國更差，經濟規模超越美國嘅可能性亦隨之消失。

佢直言，過去提出嘅「東升西降」判斷，係建基於錯誤甚至被修飾過嘅人口數據之上。若果實際人口規模早已低於官方公布嘅14億，甚至不足12.8億，加上老齡化速度遠超預期，中國嘅經濟前景同地緣政治定位，都需要全面重寫。

對於「即使人口跌至5億，中國仍然係人口大國」嘅說法，易富賢認為呢個講法完全忽略人口結構問題。佢指出，日本人口仍有一億以上，但經濟規模已由高峰期相當於美國七成以上，跌至現時約一成多，正正係人口老化嘅直接後果。

展望未來，易富賢認為，真正有潛力挑戰全球經濟格局嘅，唔會係老化嘅中國，而係人口結構年輕嘅印度，以及其他南半球國家。佢指出，未來全球趨勢與其話係「東升西降」，不如話係「南升北降」。

喺社會層面，中國正同時面對「唔願生、養唔起、生唔到」三重困局。多年計畫生育政策已深刻改變生育觀念，加上高房價、家庭可支配收入偏低、晚婚趨勢明顯、不孕率急升，令提高生育率嘅空間極為有限。即使政府推出補貼、免費分娩、延長產假等措施，成效亦十分有限。

易富賢總結指出，中國正處於典型嘅「未富先老」結構性困局。地方政府債務沉重，社保同醫保壓力急升，未來可用於投資、國防、科技創新嘅資源將進一步被擠壓。若政治與經濟制度唔作根本調整，人口下行趨勢幾乎無法逆轉，其代價將由整個社會長期承擔。