英國政府預計1月20日正式公布係咪批准中國駐英「超級大使館」嘅規劃申請。喺呢個關鍵時刻，多個維權組織、居英港人團體同埋倫敦當地居民，發起喺聽日（17日）前往位於倫敦塔對面嘅「皇家鑄幣廠」（Royal Mint Court）舊址集結示威。今次行動除咗係「最後一博」反對建案之外，更因為近日傳出使館地底設計圖內藏超過200個「秘密房間」，令英國政界同民間對國家安全嘅憂慮推向頂點。

根據英國傳媒近日披露嘅一份未經刪減設計圖則顯示，呢座預計成為中國喺歐洲最大規模嘅外交設施，地底竟然規劃咗多達208個「隱蔽空間」。最令英國國安專家頭痕嘅，係其中一間密室嘅牆壁，竟然距離連接倫敦金融城同埋十幾個數據中心嘅核心光纖電纜只有一米左右。

多名英國跨黨派議員批評，呢種設計極之反常，質疑入面會安裝高性能電腦或竊聽設備，將使館變成「特大型情報中心」。保守黨前黨魁施志安（Iain Duncan Smith）同埋多位工黨後座議員都聯手向首相施紀賢（Keir Starmer）施壓，要求政府唔好因為想改善對華貿易關係而犧牲國安。

除咗國安風險，聽日嘅示威亦聚焦喺對離散族群嘅威脅。參與籌劃示威嘅居英港人組織代表指出，呢座「超級使館」如果落成，內部可以容納幾百名中方官員，屆時對於身處英國嘅政治異見人士、港人、維吾爾人同藏人嚟講，無疑係喺屋企門口放咗一個「監視塔」。

有參與集會嘅港人表示：「我哋嚟英國係為咗自由，但如果呢個超級使館起喺咁近市中心，仲要有咁多不明用途嘅設施，我哋會擔心平時示威會被影相紀錄，甚至發生好似之前曼徹斯特領事館咁嘅暴力事件。」

面對工黨政府可能「開綠燈」，當地居民組織亦無坐以待斃。喺聽日嘅集會上，主辦方將會發起群眾募資，目標係籌集14.5萬英鎊，準備喺政府宣布批准申請後即時入稟法院進行「司法覆核」。

目前外界普遍預計，首相施紀賢為咗促成月底嘅訪華行程，好大機會會無視反對聲音批准建案。不過，工黨內部反彈聲浪不絕，有議員直言：「唔應該用國家安全嚟換取貿易條件。」