伊朗局勢持續動盪，政府在多地展開血腥鎮壓之際，經濟層面亦急速惡化。伊朗貨幣里亞爾（Rial）近日出現失控式下瀉，匯價一舉跌穿「100萬里亞爾兌1美元」呢個心理關口。同一時間，消息指伊朗權力核心喺過去兩日內，已急速撤走超過百億港元資產，美國財政部亦罕有高調表態，明言會密切追蹤伊朗領導層嘅資金流向。

長期通脹失控之下，伊朗民眾日常買餸都要拎住一大疊鈔票。自上周五開始，里亞爾持續急挫，正式跌穿1美元兌100萬里亞爾水平，目前市價約喺106萬里亞爾兌1美元，即係1里亞爾只值約0.000000939499美元。對比2015年伊朗核協議簽署時，當年匯率仍維持喺約3.2萬里亞爾兌1美元，至今累計貶值已超過30倍。

官方公布嘅通脹率長期企喺40%以上，實際生活成本升幅更被普遍認為遠高於官方數字。部分商戶交易時已唔再理會鈔票面額，而係直接「睇厚度」收錢。有少量積蓄嘅市民，紛紛將資金兌換成美元、歐元或者黃金，甚至喺部分地區出現以物易物嘅情況。隨住民眾對本國貨幣嘅信心全面瓦解，通脹惡化同匯率下瀉形成惡性循環，短期內難見止跌跡象。

經濟崩潰疊加政治不穩，去年底起德黑蘭率先爆發大規模罷工同示威，抗議物價飆升同經濟停滯，其後學生群體加入，抗爭迅速蔓延至全國超過一百個城市。當局隨即以強硬手段鎮壓。美國CBS引述消息人士指，衝突至今至少造成12,000人死亡；伊朗官方本周二則承認約有2,000人喪生，雙方數字差距巨大。

資金外逃情況同樣引起國際關注。以色列媒體「14頻道」引述知情人士披露，伊朗領導階層喺短短數十小時內，已將約15億美元（折合約117億港元），轉移至杜拜嘅海外帳戶。相關資金多數透過加密貨幣形式轉移，刻意避開傳統銀行系統。有熟悉伊朗伊斯蘭革命衛隊經濟網絡嘅人士指出，部分資金轉運行動與革命衛隊有關，亦有傳伊朗最高領袖哈梅內伊之子穆吉塔巴牽涉其中。

由於多年來受到國際制裁同銀行管制影響，伊朗進行傳統跨境轉帳嘅難度大增，近年愈來愈依賴加密貨幣同非正式地下渠道，將資金輸往海外。

美國方面隨即作出回應。財政部長貝森特接受當地媒體訪問時表示，華府已留意到伊朗領導層正將「數以百萬、甚至數以千萬美元」秘密轉移出境，形容情況猶如「老鼠紛紛棄船」。佢強調，財政部作為制裁執行部門，核心任務就係追蹤資金流向，無論經由銀行體系抑或數碼資產，「都唔可能長期避得過」。

回顧美伊關係，美國總統特朗普喺2018年任內宣布重啟對伊朗嘅「極限施壓」政策，全面收緊制裁，切斷伊朗石油出口呢條經濟命脈，令里亞爾失去美元外匯支撐，匯率長期難以穩定。

隨住里亞爾出現「free fall」式貶值，外界亦重新審視伊朗同中國簽署嘅25年戰略合作協議，是否仍然具備穩定經濟嘅實際效力。該協議原本被視為伊朗喺西方制裁下嘅重要「外部支撐」，涵蓋能源、基建同長期經濟合作，但喺貨幣信用接近崩潰、資本持續外逃嘅背景下，其實際作用正面臨愈來愈多質疑。