北京大學經濟學院教授、國民經濟研究中心主任蘇劍尋日（15日）喺中國記協舉辦嘅「新聞茶座」上預測，2026年中國政府工作報告好大機會繼續將全年經濟增長目標定喺5%左右。佢強調，雖然外部環境挑戰越嚟越犀利，但中國只要「練好內功」，靠超大規模市場同科技創新，依然有底氣維持中高速增長。

蘇劍喺解讀2025年中共中央經濟工作會議精神時指出，當前國際形勢雖然喺部分外交活動下有所緩和，但全球經濟下行壓力依然唔細。佢特別提醒，2026年要提防歐盟可能引發嘅貿易摩擦，因為中國嘅貿易順差已經去到歷史新高，難免會令部分經濟體感到擔憂。

不過，佢認為中國唔使過分驚慌。蘇劍形容，而家嘅環境係「逆風行舟」，最緊要係將重心放返喺國內，加快建設「全國統一大市場」，將超大市場規模嘅潛力真正釋放出來。

講到增長動力，蘇劍認為單靠傳統嘅財政同貨幣政策已經唔夠，關鍵係要搞好「新質生產力」。佢建議要深化教育體制改革，提升科技創新能力，用產品創新去帶動高品質嘅需求。

佢分析話，2026年係「十五五」規劃（2026-2030）嘅開局之年，維持5%左右嘅增長目標，唔單止係為咗穩定市場信心，更加係為咗實現2035年人均 GDP 達到中等發達國家水平嘅長遠目標。如果前期增長太慢，後面嘅壓力就會好大。

雖然蘇劍對 5%抱有信心，但市場上亦有唔同聲氣。部分國際金融機構好似高盛咁，預測2026年中國GDP增長大約係4.8%，而世界銀行就相對保守，估計喺4.4%左右。

對此，蘇劍認為中國經濟「長期向好」嘅趨勢冇變。佢相信，透過實施更積極有為嘅宏觀政策，例如延續積極嘅財政政策同適度寬鬆嘅貨幣政策，中國絕對有能力「跳一跳，摘到果子」。

因為長年GDP增長都係5%而冇乜波動，有內地Youtuber為敬愛嘅習近平同志送上花名「五號電池」。先不論5%係真定假，GDP本身冇任何實質意義，人民生活好壞要睇嘅係「人均可支配收入」。官員以GDP為晉升標準正正係今日中國基建同產能過剩、深陷通縮嘅元兇，此國策不改，中國境況只會越來越大鑊。