美國總統特朗普喺當地時間週三正式簽署行政命令，宣布暫時唔會對稀土、鋰等關鍵礦產徵收額外關稅。呢個決定令市場大感意外，因為之前白宮一直放風話會用關稅嚟打擊對外依賴。但係，今次特朗普揀咗「收火」，並唔代表佢放棄「美國優先」，反而係反映出美國目前喺供應鏈上嘅「軟肋」。

根據商務部長盧特尼克（Howard Lutnick）提交嘅「232 條款」調查報告，美國目前超過一半嘅關鍵礦產都要靠進口，其中最大供應商正係中國。報告直言，美國對外國供應鏈「過度依賴」，特別係喺礦產加工方面，美國幾乎係「交白卷」。

特朗普喺命令入面講得好白：「如果我哋連加工都要靠外國，就算喺自己國內挖到幾多礦都係冇用，根本保證唔到國家安全。」呢番話點出咗核心問題：美國而家就算想「硬起嚟」徵關稅，最後受苦嘅只會係自己國內嘅高科技同國防企業，因為佢哋根本搵唔到替代供應。

雖然暫時唔徵關稅，但特朗普唔會就咁算數。佢已經下令貿易代表葛里爾（Jamieson Greer）同盧特尼克去搵國際盟友「傾數」。今次佢哋祭出一招新招式——「價格底線」（Price Floor）機制。

呢招係咩玩法？簡單嚟講，就係要同盟友達成協議，規定關鍵礦產唔可以賤價出售。點解要咁做？因為西方國家嘅礦商一直抱怨，話某啲國家利用低價傾銷嚟擠壓市場，令到美國本土嘅採礦場同加工廠根本生存唔到。如果設定咗最低進口價，就可以確保本土產業有足夠利潤去投資、去擴張。

市場分析認為，特朗普今次「褪後一步」有幾個考慮：最高法院嘅陰霾，而家最高法院仲審議緊特朗普之前啲關稅政策係咪合法，如果呢個時候再開新戰線，法律風險太高。通脹壓力，美國國內生產者物價指數（PPI）啱啱升到 3%，係近年高位。如果再加礦產關稅，電動車、半導體同國防裝備嘅成本一定飛升，變相係推高通脹，對選情或者民望都冇好處。核能同AI 需求，而家美國全力發展 AI 同新一代核能，對鈾同稀土嘅需求係「大胃王」級別，斷咗供應等同於斷咗自己條路。

雖然呢個決定暫時穩定咗市場情緒，但係美國本土嘅採礦商就未必咁開心。佢哋一直期望關稅可以幫佢哋擋住外國競爭，而家特朗普轉向搞「外交談判」同「價格下限」，遠水救唔救到近火，仲係未知之數。