中東局勢近日劍拔弩張，美國特朗普政府正考慮對伊朗發動軍事打擊，以回應德黑蘭近期對抗議活動的鎮壓及其核計劃挑釁。不過，一向同伊朗「唔太啱牙」的波斯灣鄰國，今次卻罕有地採取一致行動，集體向華府開聲，勸喻美軍千萬不要動武，擔心一旦開戰，成個中東會陷入「火海」，更會搞禍全球能源市場。

根據《華爾街日報》及多間國際媒體消息，沙地阿拉伯、卡塔爾及阿曼等波斯灣國家，近期頻頻私下同華府「通話」。消息指，這幾個阿拉伯國家已經明確向白宮表態：如果美國試圖透過軍事手段去推翻伊朗政權，或者進行大規模空襲，將會導致區域局勢失控。

最令華府頭痛的是，沙地官員已經向伊朗方面「派定心丸」，保證利雅得政府唔會捲入潛在的衝突，亦絕對唔會允許美軍使用沙特領空進行打擊。呢種「劃清界線」的舉動，反映出波斯灣各國深怕一旦開戰，自己會成為伊朗導彈報復的首要目標。

波斯灣各國今次咁團結，最核心的考量始終係「經濟利益」。各國向華府警告，伊朗手握荷莫茲海峽（Strait of Hormuz）呢條咽喉要道，全球大約五分之一的石油運送都要經過呢度。如果美國開火，伊朗極大機會封鎖海峽，到時唔單止中東經濟「大出血」，全球油價更可能升到失控，最終反過來損害美國自身的經濟。

有中東分析家指出，沙地目前正全力推動「2030願景」經濟改革，需要的是穩定的地區環境去吸引投資。佢哋認為，「雖然各國對伊朗政權無乜好感，但比起憎伊朗，佢哋更驚動盪局面。」

雖然波斯灣各國反對全面戰爭，但亦有消息傳出，沙地等國建議特朗普政府，如果一定要採取行動，應考慮「有限度且精準」的打擊，或者透過提供免費衛星網絡（如 Starlink）等方式支援伊朗國內的抗爭，而非採取可能導致政權崩潰的大規模軍事行動。佢哋擔心，伊朗一旦陷入權力真空，最終會由更加激進的「伊斯蘭革命衛隊」掌權，令局勢更加難搞。