美國華盛頓與法蘭克福連線報導，這絕對是金融史上罕見嘅「名場面」！就在美國總統特朗普與聯儲局主席鮑威爾嘅鬥爭進入白熱化之際，全球九大央行行長日前罕有地發表聯合聲明，向鮑威爾投下「完全信任票」，擺明車馬要與美國白宮唱反調，維護央行獨立性。

事緣特朗普政府近期對聯儲局步步進逼，最新的戰場竟然係聯儲局總部大樓嘅翻新工程。這項耗資約25億美元（約194億港元）嘅工程，被特朗普陣營形容為「史上最貴裝修」，指控鮑威爾濫用公帑去搞「豪華大理石」、「VIP專用升降機」。美國司法部更在特朗普授意下，由華盛頓特區聯邦檢察官Jeanine Pirro帶頭，向聯儲局發出傳票，甚至威脅要對鮑威爾提出刑事起訴，罪名涉及「嚴重管理不善」。

不過，明眼人都睇得出，呢單「裝修案」只係藉口。鮑威爾週打破沉默，直指白宮嘅真正目的係想奪取利率控制權。佢在聲明中反擊，指特朗普政府因為聯儲局不肯配合大幅減息，所以用刑事調查作為政治恐嚇嘅手段。鮑威爾強硬表示：「這是為了公眾利益，我們不會屈服。」

面對美國總統嘅「核彈級」施壓，全球央行圈決心不再做「花生友」。由歐洲央行（ECB）行長拉加德（Christine Lagarde）及英倫銀行行長貝利（Andrew Bailey）牽頭，聯同另外七國央行行長發出聯合聲明，內容字字珠璣，強調鮑威爾「一直秉持正直品格」，並指「央行獨立性是價格與金融穩定嘅基石」。

這份聲明嘅聯署名單堪稱央行界「復仇者聯盟」，除咗英歐兩大巨頭，仲包括：澳洲儲備銀行行長布洛克（Michele Bullock），加拿大銀行行長麥克勒姆（Tiff Macklem），瑞士國家銀行行長施萊格爾（Martin Schlegel），瑞典、丹麥、韓國、巴西嘅央行掌舵人，國際清算銀行（BIS）高層亦加入聯署

不過，眼利嘅市場人士發現，G7成員國之一嘅日本銀行竟然「無影」。據悉，這份聲明話「之後可能有更多央行加入」，暗示日本方面可能因為種種政治考量，暫時未敢正面得罪特朗普。

雖然政治風暴升級，但華爾街投資者似乎已經對特朗普嘅「嘴炮」產生免疫力。美股週一依然創下新高，投資者似乎賭定特朗普只係想施壓減息，而唔會真係搞冧個市。不過，避險情緒已經轉向黃金，金價在消息傳出後一度飆升至每盎司4,612美元嘅歷史天價，反映資金正湧入避險資產，擔心這場「強人總統 vs 技術官僚」嘅大戰會引發黑天鵝事件。

除了國際聲援，美國國內亦有重量級人物發聲。3名前聯儲局主席，包括格林斯潘(Alan Greenspan)、伯南克(Ben Bernanke)和耶倫(Janet Yellen)，連同另外10名前美國政府經濟政策高官，包括前財政部長蓋特納(Timothy Geithner)和傑克盧(Jacob Lew)等聯合發表聲明，罕有地批評白宮做法「前所未見」。警告將聯儲局政治化會帶來災難性後果。參議院銀行委員會嘅共和黨議員Thom Tillis甚至威脅，在調查結束前會封殺特朗普所有聯儲局提名人選，令這場政治風暴隨時演變成憲制危機。

目前局勢清楚顯示，這已不僅是美國國內嘅權力鬥爭，而是演變成全球金融精英維護「獨立堡壘」嘅保衛戰。鮑威爾能否在特朗普嘅司法大棒下守住聯儲局嘅金漆招牌，將是2026年全球金融市場最大嘅懸念。