美國特種部隊早前悍然發動軍事行動，直搗委內瑞拉並生擒總統馬杜羅，呢一幕荷里活式嘅突襲雖然震驚全球，但喺大西洋彼岸嘅盟友德國眼裡，卻係一場外交災難。根據德國權威媒體《德國電視一台》（ARD）最新公佈嘅「德國趨勢」（DeutschlandTrend）民調顯示，德美關係已經跌至冰點，德國民眾對美國作為「可信賴夥伴」嘅信心崩盤式下跌至15%，創下歷史新低，數據甚至已經跌到貼近對俄羅斯嘅信任度。

呢份喺2026年1月公佈嘅震撼民調，赤裸裸咁揭示咗德國社會對華盛頓嘅極度恐慌同不滿。導火線毫無疑問係特朗普政府對委內瑞拉採取嘅激進軍事手段。調查發現，高達72%嘅德國受訪者認為，美軍對委內瑞拉發動空襲並且「綁架式」拘捕馬杜羅，根本毫無正當性可言。只有12%嘅人認為呢個做法係合理。相比起2003年美國入侵伊拉克嗰陣，當時有80%德國人反對，雖然今次反對比例稍微低咗少少，但分析認為，呢個係因為部份民眾已經對國際亂局感到麻木，甚至有16%嘅人選擇「封口」唔評論，反映出一種深層次嘅無力感。

對於特朗普本人，德國人嘅厭惡情緒亦達到頂峰。民調顯示，只有12%嘅受訪者對特朗普嘅執政表現持正面評價。更諷刺嘅係，當被問到邊個國家係值得信賴嘅夥伴時，作為北約核心盟友嘅美國，竟然只攞到15%嘅信任票。大家要留意，德國人對俄羅斯嘅信任度係9%，換句話講，喺德國人心中，今日嘅美國同普京（Vladimir Putin）治下嘅俄羅斯，喺「不可信」程度上已經相差無幾。相比之下，法國同英國分別有78%同74%嘅高信任度，顯得美德關係更加疏離。

面對特朗普嘅「狂人外交」，德國社會對於政府應該點樣應對陷入咗嚴重分裂。默茨（Friedrich Merz）領導嘅德國政府目前處境尷尬。民調顯示，39%嘅人認為柏林應該「忍氣吞聲」，保持克制，避免激怒呢位不可預測嘅美國總統；但亦有半數（50%）民眾強硬表態，認為德國同歐盟必須挺直腰骨，明確反對美國嘅霸權行徑，就算搞僵關係都喺所不惜。

深入分析各黨派支持者嘅取態，可以見到德國社會嘅撕裂。極右翼嘅德國選擇黨（AfD）支持者傾向「鴕鳥政策」，58%主張克制；而默茨所屬嘅聯盟黨內部就最為糾結，45%怕得罪特朗普，48%就想硬碰硬，呢種分歧令到默茨政府喺外交表態上顯得步步為營。反觀左翼陣營，社民黨同綠黨嘅支持者就大多主張要對美國口誅筆伐。

除咗外交風暴，德國民眾對自身安全亦充滿焦慮。81%嘅人擔心世界政治正在變成「弱肉強食」嘅叢林法則，70%嘅人甚至質疑美國喺北約入面仲會唔會履行保護德國嘅職責。喺呢種不安全感驅使下，超過一半（53%）嘅德國人支持建立一個更加獨立於北約之外嘅「歐洲軍事聯盟」，反映出歐洲戰略自主嘅呼聲越嚟越高。

將鏡頭轉返國內，雖然外交立立亂，但默茨政府喺內政上似乎搵到少少突破口。雖然有84%嘅民眾依然對國家現狀感到憂慮，經濟前景亦未見太大起色，但係喺最棘手嘅移民問題上，政府嘅評分出現咗觸底反彈嘅跡象。