美國明尼阿波利斯（Minneapolis）日前發生咗單震驚全美嘅執法殺人案，隨即引爆聯邦政府同地方官員之間嘅激烈罵戰。事緣特朗普政府號稱「史上最大規模」嘅反移民行動殺入當地，期間一名美國移民及海關執法局（ICE）探員當街開槍，擊斃一名37歲女子。死者證實係當地詩人兼三孩之母，並唔係當局口中嘅危險分子。雖然國土安全部（DHS）事後好快手將事件定性做「本土恐怖主義」，聲稱死者企圖撞人，但明市市長喺睇完事發影片後火滾，直斥聯邦政府嘅講法係「Bullshit」（廢話），甚至要求ICE即刻撤出該市。

事發喺周三朝早約9點半，地點係明尼阿波利斯南部一個本來好靜嘅住宅區，距離2020年弗洛伊德（George Floyd）案發現場只係隔一英里。死者係37歲嘅古德（Renee Nicole McClain Goode）。據家屬講，古德係個充滿愛心嘅阿媽，當時啱啱送完6歲細仔返學，正同伴侶揸車返屋企，點知撞正喺區內大舉搜捕嘅ICE探員，就咁送咗命。根據網上瘋傳嘅目擊者片段見到，古德揸嗰架紅色本田（Honda）Pilot SUV俾幾個探員包圍，有個探員想強行拉開車門，古德架車一度溜前。就喺電光火石之間，另一個企喺車頭嘅探員突然拔槍，近距離向擋風玻璃連開至少兩槍，隨即跳開。古德頭部中彈，車輛失控撞向路邊私家車後停低，送院後證實不治。

古德係土生土長嘅科羅拉多州人，擁有美國公民身份，除咗幾張交通告票之外身家清白。佢喺社交平台形容自己係「詩人、作家、老婆同阿媽」，生前曾喺維珍尼亞州老道明大學讀創意寫作仲攞過獎。佢前夫悲痛咁話，古德係個虔誠基督徒，絕非激進分子。不過，面對群情洶湧，特朗普政府採取強硬態度。國土安全部長諾姆（Kristi Noem）喺記者會上指鹿為馬，形容事件係「針對執法人員嘅本土恐怖主義行為」。諾姆聲稱古德當時將架車當武器，「企圖殺死或傷害執法人員」，探員開槍係為咗保命同保護伙記，完全符合訓練指引，更揚言FBI已介入調查。總統特朗普亦喺 truth social 發文護短，形容古德係「專業煽動者」（Professional Agitator），指責佢「兇殘地」企圖撞死探員，藉此合理化ICE嘅行動。

聯邦政府嘅說法即刻俾地方官員狂插。明尼阿波利斯市長弗雷（Jacob Frey）喺記者會上表現激動，佢話：「我親眼睇過條片，佢哋話係自衛？根本就係Bullshit！呢個係完全可以避免嘅悲劇。」弗雷批評ICE嘅行動只係喺社區製造恐慌同混亂，正式要求ICE撤離該市。明尼蘇達州州長華茲（Tim Walz）亦加入戰團，怒斥特朗普政府利用今次行動「做騷」，將執法變成政治宣傳機器，結果搞出人命。當地警察局長奧哈拉（Brian O’Hara）亦無附和聯邦政府嘅「自衛論」，明顯見到地方執法部門同聯邦探員之間已經面左左。

法律專家亦質疑ICE做法有問題，指出向行駛中嘅車開槍係極度危險且過時嘅做法。威斯康辛大學法學教授格羅斯（John P. Gross）睇完片後直言，如果司機只係阻住執法，探員有權拉人但無權殺人，「單睇影片，呢個似乎係極度過份使用武力嘅惡劣例子」。事實上，自1972年紐約警隊禁止呢類行為後，全美多地警隊已經跟隨，唯獨聯邦指引仲有灰色地帶。事發當晚，幾百個憤怒市民去到案發現場守夜，古德嘅同性伴侶喺現場崩潰痛哭，高呼「嗰個係我老婆！我唔知點算好！」，聞者心酸。示威者高舉標語，怒吼「ICE滾出明尼蘇達」。隨住亨內平縣檢察官辦公室表明會介入調查，呢場由雪地槍聲引發嘅政治風暴，恐防會喺特朗普政府強硬嘅移民政策背景下越演越烈。