中國國台辦發言人陳斌華周三（7日）公布，將台灣內政部門負責人劉世芳同台灣教育部門負責人鄭英耀，列為「台獨」頑固分子，並依法實施懲戒；同時，亦將被點名為「綠色司法打手」嘅台灣高等檢察署檢察官陳舒怡，列為「台獨」打手幫兇，依法終身追責。

陳斌華話，劉世芳同鄭英耀長期倒行逆施，「台獨」行徑一籮籮，引起兩岸同胞強烈不滿，國台辦亦收到唔少舉報，要求對兩人作出懲處。佢批評，劉世芳公然宣揚「台獨」分裂謬論，大肆打壓支持或者參與兩岸交流合作嘅台灣人士，迫害在台嘅大陸配偶，又刻意為兩岸人員往來設下重重障礙，封死雙方交流溝通嘅渠道。

至於鄭英耀，就被指大力鼓吹謀「獨」嘅挑釁言論，組織編寫「台獨」教材，向島內青少年灌輸分裂思想，同時阻撓兩岸教育交流合作。國台辦認為，兩人行為已屬公開分裂國家、煽動分裂國家，根據相關法規，決定將劉世芳同鄭英耀列入「台獨」頑固分子清單並作出制裁。

另外，國台辦亦點名陳舒怡，指佢甘願充當「台獨」打手幫兇，羅織罪名、炮製冤案，針對支持或者參與兩岸交流合作嘅台灣人士作出迫害，又利用司法手段恐嚇民眾，製造所謂「綠色恐怖」，形容其所作所為性質惡劣、罪行嚴重。國台辦表示，會繼續向兩岸社會徵集相關違法犯罪線索同證據，並會以事實同法律為依據，對陳舒怡依法嚴懲，終身追責。

與此同時，台灣最大在野黨「中國國民黨」副主席蕭旭岑周一（5日）受訪時表示，個人判斷大陸未必會複製所謂「斬首」行動，因為陸方對台灣仍然有感情，但如果賴清德繼續行「台獨」路線，兩岸之間嘅潛在衝突，始終都難以避免。

蕭旭岑談到馬杜羅被美方強行帶走一事時，形容事件相當嚴重，足以改變世界格局。佢指出，美國過往一向冇少做顛覆其他國家政權嘅事，手段包括顏色革命、向反對派提供軍火等，但今次行動就直接跳過晒呢啲程序。佢又話，如果主權國家嘅總統都可以被帶去另一個國家，仲要按照美國國內法去處理，北京當局亦可以依照自身法律，派出海警喺台海執法盤查，並警告綠營政客「哀矜勿喜」。

不過，蕭旭岑亦指出，如果北京真係對台採取「斬首」行動，唔單止會對整個中華民族嘅整體利益造成嚴重傷害，亦會令兩岸關係徹底走向冇得返轉頭嘅局面，所付出嘅政治同戰略代價，遠遠大過可能得到嘅利益，對兩岸長遠發展冇好處。至於有傳國民黨主席鄭麗文可能訪問大陸，蕭旭岑就話暫時未有進一步消息，但喺兩岸局勢高度緊張之下，任何有助紓緩關係、增進互信嘅交流，對台灣嚟講都係好事。