中國外交部發言人林劍日前舉行例行記者會，被問到美國近日先後對委內瑞拉及伊朗採取軍事行動，中方會否為全球盟友提供更有力安全保障。林劍回應指，中國奉行「結伴而不結盟」嘅外交政策，希望伊朗政府同人民能夠克服當前困難，保持國家穩定，中方一貫反對外部勢力干涉伊朗內政，並呼籲各方多做有利於促進中東和平穩定嘅事情，強調會同國際社會一齊，堅定捍衛《聯合國憲章》。

與此同時，美國軍事動向亦引發外界高度關注。香港時間5日中午左右，即美東時間仍屬4日深夜，五角大廈周邊多間披薩店突然出現異常繁忙情況，被視為「五角大廈披薩指數」急升，再度引發市場同輿論聯想到，可能與美國同以色列就伊朗局勢提升戒備有關。

多名網民發現，距離五角大廈約2.3英里的Papa John披薩店，生意量突然暴增至平日約12倍半；另一間距離約1英里的分店，生意亦錄得超過3倍增長。

X平台知名追蹤帳號「Pentagon Pizza Watch」亦指出，五角大廈附近嘅達美樂披薩，銷量比平時多出約4倍，令所謂「五角大廈披薩指數」嘅非官方備戰等級升至第4級，僅次於最高戒備狀態。

所謂「披薩指數」由來已久，可追溯至冷戰時期，當年有傳聞指蘇聯特務會透過觀察華府披薩外送量，推斷美國政府是否正策劃重大行動。歷史上，1990年伊拉克入侵科威特，以及1991年波斯灣戰爭爆發前，五角大廈周邊披薩店生意亦曾出現類似異常。上星期美軍突襲並活捉委內瑞拉總統馬杜羅（Nicolás Maduro）前，Papa John生意量亦曾急升超過7倍，今次更飆至12倍半，令外界揣測是否有更大規模軍事行動正在醞釀。

近期美國同以色列針對伊朗嘅動作亦相當頻繁。喺披薩指數急升之前，美國國務院波斯語官方帳號喺X平台上載美國總統特朗普（Donald Trump）嘅照片，配上紅色警告字句「不要和特朗普總統玩遊戲」，並形容佢係「行動派」，警告意味相當明顯。特朗普上星期亦曾公開向伊朗放話，指如果伊朗政權導致更多民眾喪生，伊朗將會面對「非常嚴厲的打擊」。

以色列方面，《耶路撒冷郵報》同i24news報道指，總理內塔尼亞胡（Benjamin Netanyahu）已批准新一輪針對伊朗嘅攻擊計畫，代號「鐵拳打擊」。以色列軍方擔心伊朗可能將火力轉向以色列，已進入最高戒備狀態。內塔尼亞胡亦召集安全內閣部長，舉行長達5小時嘅馬拉松會議，討論行動時機及多條戰線嘅局勢。

伊朗國內局勢同樣緊張，全國各地已連續8日爆發示威。最新消息指，至少26個省、78個城市出現抗議、罷工同學生騷亂，死亡人數已升至20人，包括19名民眾同1名安全部隊人員。即使當局加派警力，抗議規模仍持續擴大。

軍事層面方面，伊朗革命衛隊亦持續進行飛彈及空中演習，並啟動防空系統。德黑蘭同設拉子上空更傳出爆炸閃光，顯示軍方已處於高度戒備狀態，以防突發事件。伊朗外交部5日就事件譴責美國同以色列，指控兩國干涉伊朗內政，並公開煽動暴力。外交部發言人巴蓋伊（Esmail Baghaei）強調，有關言論已經違反國際規範。