中共中央軍委辦公廳日前公布《兵役登記工作規定》，並由2026年1月1日起正式生效。按新規定，今年開始，所有年滿18歲嘅中國男性，無論本人有冇意願參軍，都必須依規定完成兵役登記，否則日後升學同搵工都可能受到影響。

目前內地實行以志願兵役為主、配合義務兵役嘅混合兵役制度。根據《兵役登記工作規定》，凡符合條件嘅男性公民，即每年12月31日前已滿18歲者，都要依法進行兵役登記。2026年嘅首次兵役登記期，由1月1日至9月30日。

完成兵役登記之後，相關兵役機關會因應部隊需要同個人條件作審查，揀選部分人入伍服義務兵役。一般服役期為兩年，期滿後大多數人會退役，當中表現較好兼自願嘅義務兵，則可以申請轉為軍士，改為以志願兵身份長期服役。

新華社報道指，《兵役登記工作規定》出台同落實，係中國兵役制度改革嘅重要成果，對兵員徵集等工作具重要意義。內地媒體亦指出，強制兵役登記主要係方便官方掌握兵員潛力，以便應付突發或緊急情況。

央視網引述四川省徵兵辦公室工作人員張洪瑞表示，完成初次兵役登記係應徵入伍嘅前提條件，至於會唔會正式報名參軍，適齡男青年仍可按自己實際情況，自願作出選擇。

近日多間內地媒體亦提醒，今年起凡年滿18歲嘅男性，都必須完成兵役登記，否則會影響日後升學同就業。20歲、姓韓嘅北京青年日前接受美國之音訪問時表示，雖然中國一直都有規定適齡男性要登記兵役，但近年媒體直接點明「唔登記嘅後果」，情況並唔常見。

該名韓姓青年話，以前相關宣傳並唔多，最多只係居委會打電話提醒要辦理登記；而喺入大學之前，必須攞到兵役登記證明，否則係唔可以辦理入學手續。

美國之音早前報道指，解放軍透過宣傳方式警告適齡青年唔登記兵役後果嚴重，有部分輿論解讀為同台海局勢有關。不過，解放軍海軍司令部前中校參謀姚誠接受美國之音訪問時就表示，將之理解為「為攻台作準備」未必準確，反而徵兵吸引力下降，可能先係更核心嘅原因。

姚誠指出，中國軍隊已經兩年幾冇加過人工，反而有唔少福利被取消，退伍之後亦唔再由國家分配工作，當完兩年兵之後，仲要自己出去搵工，令唔少人覺得當兵只係「混口飯食」。再加上未來戰爭風險愈來愈高，家長普遍都唔願意將仔女送上戰場。

姚誠認為，強制兵役登記本身根本無法確保未來會有更多年輕人願意投身軍隊。他話，登記係一定要登記，如果唔登記，將來考大學、搵工都會遇到阻礙，當地派出所亦可能會要求補辦，但「上有政策、下有對策」，好多人仍然會用各種方法去避兵役。

佢又話，有家長可以同當局講仔女出去打工，唔喺屋企，又聯絡唔到，咁相關部門實際上亦好難再進一步處理。