近年中國高鐵投資被指擴張過快、營運虧損壓力加重之際，中國國家鐵路集團表示，2025年全國鐵路完成嘅固定資產投資仍高達人民幣9,015億元，按年上升6%，金額再創歷史新高。其中，2025年新通車嘅高鐵里程達2,862公里。

綜合《第一財經》同《界面新聞》報道，中國國家鐵路集團今日召開2026年工作會議，並公布相關數據。資料顯示，2021年至2024年，中國鐵路固定資產投資額分別為7,489億、7,109億、7,645億及8,506億元；至於2016年至2020年間，除咗2020年投資額為7,819億元，其餘年份均介乎8,010億至8,029億元之間。

按國鐵集團公布，2025年全國新通車鐵路里程合共3,109公里，其中高鐵佔2,862公里，全國鐵路營業總里程亦因此增至16.5萬公里。

北京社科院副研究員王鵬指出，2025年中國鐵路投資規模再創新高，其戰略意義已經唔再局限於單一基建層面，而係被視為「穩定經濟大盤嘅壓艙石」，同時亦係「釋放內需潛力嘅催化劑」。

不過，《明報》日前報道指出，中國高鐵項目長期面對沉重債務壓力。截至2024年底，中國國家鐵路集團總負債高達6.2萬億元人民幣，負債率達63.52%。目前全國只有京滬、京津、滬杭、滬寧、寧杭、廣深港等少數途經經濟發達、人口密集地區嘅高鐵路線錄得盈利，但相關里程僅佔全國高鐵總里程約5%。

另外，《中國經營報》於2024年5月曾報道，全國至少有26個高鐵站因選址偏遠，周邊配套不足、客流量偏低，長期處於閒置或低使用狀態。