阿聯酋宣布，將撤走目前仍然駐守也門嘅剩餘部隊。呢個決定，正正發生喺沙特力撐嘅也門總統委員會，向阿聯酋發出最後通牒、要求其24小時內撤軍之後。分析認為，事件標誌住沙特同阿聯酋之間，原本堅固嘅盟友關係，已經出現實質性裂痕，甚至去到公開對立嘅邊緣。

《路透社》引述沙特主導嘅多國聯軍消息人士話，早前有兩艘由阿聯酋富查伊拉港出發嘅船隻，未經聯軍批准，擅自駛入也門南部港口穆卡拉（Mukalla），並喺當地卸載大批軍事物資。沙特方面指，為免相關物資最終落入阿聯支持嘅分離主義武裝手中，聯軍其後選擇喺夜間對港口發動精準空襲，以減低對平民造成嘅附帶傷害。沙特官方表示，行動中並無造成任何人員傷亡。

事件隨即引發也門政府強烈反彈。也門總統委員會主席拉沙德・阿里米（Rashad al-Alimi）迅速下令，要求阿聯酋部隊喺24小時內全面撤出也門，並同時宣布取消同阿聯酋之間嘅防務合作協議。阿里米直言，阿聯酋長期透過支持「南方過渡委員會」（STC），唔單止令也門國內武裝衝突升級，相關行動更加已經直接威脅到沙特嘅國家安全同戰略利益。

阿里米喺聲明中措辭相當強硬，指「已經有確鑿證據顯示，阿聯酋不但向南方過渡委員會施壓，仲實際介入指揮其軍事行動」，透過不斷升級嘅衝突，削弱也門合法政府嘅權威。他又指控，相關武裝行動多次襲擊政府軍據點，同時波及哈德拉毛省（Hadramawt）多個部族社群同無辜平民，更關閉賽雲（Seiyun）機場嘅商業航班，對民生造成嚴重衝擊。

不過，南方過渡委員會（STC）方面拒絕執行撤軍命令，並發表聯合聲明回應，強調任何單方面決定，都無法改變其喺聯軍框架內嘅地位。聲明重申，阿聯酋依然係打擊親伊朗武裝「胡賽武裝」嘅重要合作夥伴，並否認有任何行動違反聯軍協議。

《美聯社》報道，也門政府已經宣布進入緊急狀態，即時對空域、港口同邊境實施為期72小時嘅全面管制，除非獲得聯軍批准，否則一律暫停所有出入境活動，反映當局對局勢失控風險高度戒備。

《路透社》引述多名地區分析人士指出，沙特同阿聯酋之間嘅分歧，已經唔再只係也門戰場層面嘅問題，未來甚至有可能衝擊石油輸出國組織（OPEC）內部嘅政策協調同決策氣氛。市場亦即時作出反應，受地緣政治緊張升溫影響，海灣多個主要股市周二普遍下跌。

英國廣播公司新聞網（BBC News）亦指出，喺阿聯酋正式宣布撤軍之前，沙特為首嘅軍事聯盟已率先對也門南部港口穆卡拉發動空襲，摧毀一批被指準備運送予阿聯支持嘅分離主義勢力嘅武器裝備。阿聯酋方面則堅決否認該批貨物涉及任何軍事用途，並對沙特嘅指控表示「深切遺憾」。

也門內戰至今已經持續超過十年。沙特同阿聯酋原本同屬對抗親伊朗叛軍胡賽武裝嘅核心盟友，但隨住戰事發展，雙方喺也門未來政治安排上嘅分歧愈來愈明顯——沙特支持嘅國際承認政府，與阿聯酋力撐嘅南部分離勢力之間多次爆發衝突，令兩國關係逐步惡化。

沙特同日進一步公開指控阿聯酋，指其向南方過渡委員會施壓，導致後者喺也門東部兩個省份對沙特支持嘅政府軍發動攻擊，相關行動唔單止破壞戰線穩定，仲可能直接危及沙特嘅國家安全。沙特警告，將會就呢類「極度危險」行為採取相應行動。

阿聯酋國防部其後於周二下午發表聲明，宣布繼六年前已「結束」大規模駐軍行動之後，現階段將「自願終止所有剩餘駐也門嘅反恐人員部署」。聲明解釋，撤離決定係基於近期局勢發展，以及對反恐行動安全同效能嘅評估，並未直接回應聯軍空襲或沙特嘅公開警告。

阿聯酋同時否認曾對任何也門勢力施壓或下達軍事指令，強調從未進行任何可能危及沙特安全、或針對其邊界嘅軍事行動。

回顧背景，也門於2014年爆發內戰，伊朗支持嘅胡賽武裝其後奪取首都沙那（Sanaa）。2015年，沙特領導阿拉伯聯軍介入戰事，試圖恢復國際承認政府嘅統治。戰火至今，估計已造成超過15萬人死亡，亦引發全球最嚴重嘅人道危機之一。

內戰初期，主張「南也門」獨立嘅南方過渡委員會，曾一度同政府結盟，聯手阻止胡賽武裝南下，成功守住重要港口城市亞丁（Aden）。不過近年嚟，STC同其盟友逐步同政府分道揚鑣，並實際控制亞丁以及南部大片地區。