日本媒體《日本經濟新聞》於今日發表專題報道，指出根據最新嘅統計數據，2025年度中國汽車製造商嘅全球銷量預計將會首度超越日本，成為全球第一。呢個消息震驚咗國際車壇，因為日本車企喺呢個「霸主」地位已經坐咗超過 20 年，今次被中國車超越，標誌著全球汽車產業嘅版圖正式發生咗大地震。

根據日經新聞引用嘅 S&P Global Mobility 數據，加上 1 月至 11 月各大車企嘅出貨資料，預測中國汽車喺 2025 年嘅全球總銷量將會按年增長 17%，達到約 2,700 萬輛。相比之下，日本車企（包括豐田、本田、日產等）嘅合計銷量大約係 2,500 萬輛，同舊年持平，亦即係話兩者之間出現咗約 200 萬輛嘅差距。

要知道，日本車喺高峰期嘅2018年，全球賣出接近 3,000 萬輛。直到2022年，日本車仲領先中國車成 800 萬輛，但估唔到只係短短三年時間，呢個優勢就已經被「抹乾淨」。

點解中國汽車可以追得咁快？報道分析指主要有三個原因。第一，係中國本土市場嘅高度佔比。而家中國車企賣出嘅車入面，有七成係供應國內市場。加上政府推行嘅「以舊換新」津貼同埋新能源配套設施，令到中國內地嘅新能源車（EV 及 PHEV）佔新車比例已經衝破六成，國產品牌好似比亞迪（BYD）、吉利（Geely）等更加係成功打入全球銷量前十名。

第二，係東盟市場嘅易主。一直以嚟，東南亞都係日本車嘅「後花園」，市佔率一度高達九成。但今年中國車喺東盟嘅銷量激增 49%，預計達到 50 萬輛。以泰國為例，豐田（Toyota）嘅數據顯示日本車嘅佔比已經跌到 69%，比起五年前嘅九成萎縮咗好多。

第三，係出口版圖嘅擴張。雖然歐美國家開始對中國電動車加徵關稅，但中國車企轉攻拉丁美洲、非洲同埋中東市場，銷量增長分別都超過三成。就算喺歐洲，中國車企亦透過出口不受關稅影響嘅「插電式混合動力車」（PHEV）嚟避開限制，預計今年喺歐洲仍能賣出 230 萬輛。

不過，報道亦都指出中國車企面對嘅危機。雖然銷量贏咗，但因為國內競爭太過激烈，各品牌瘋狂打「價格戰」，搞到毛利率跌到 4.4% 左右。雖然賣得多，但未必賺得多，甚至有分析形容呢種係「血流成河」嘅擴張。

另一邊廂，日本車企亦都開始變陣應對。雖然喺電動化步伐慢咗半拍，但豐田等日系品牌喺混合動力（HEV）技術上依然有優勢。面對中國車嘅強勢挑戰，未來幾年日本車企會點樣反擊，將會係全球汽車業嘅觀察重點。