美國總統特朗普喺昨日於佛羅里達州海湖莊園，會見到訪嘅以色列總理內塔尼亞胡，呢次係特朗普重返白宮之後，兩人嘅第五次正式會面。目前中東局勢正處於關鍵轉折點，今次會談重點圍繞住伊朗嘅核威脅、陷入僵局嘅加沙停火協議第二階段，以及內塔尼亞胡身負國際刑事法院（ICC）逮捕令嘅敏感問題。

會晤中最受觸目嘅焦點，係特朗普向伊朗發出嘅嚴厲警告。雖然美國喺今年六月曾對伊朗發動為期12日嘅軍事行動，並聲稱已經「徹底摧毀」伊朗關鍵嘅核濃縮設施，但最近以色列嘅情報顯示，伊朗正設法重建軍事設施同埋導彈庫存。對此，特朗普喺內塔尼亞胡抵達海湖莊園之後隨即向記者表示：「依家我聽聞伊朗正試圖重建軍事設施。如果佢哋真係咁做，我哋就必須摧毀佢哋。我哋會狠狠咁打擊佢哋，但希望呢種情況唔會發生。」預計內塔尼亞胡會藉住今次訪美，進一步推動美國採取更多行動去打擊伊朗嘅核計劃，以確保以色列唔會受到遠程導彈嘅威脅。

除咗伊朗問題，加沙停火協議嘅進展亦係今次會談嘅核心。自今年10月10日開始，加沙地帶一直維持住脆弱嘅停火局面。呢份由華盛頓支持、包含20項內容嘅計劃，原本係想結束持續超過兩年嘅衝突，但目前進入落實更複雜嘅「第二階段」時就遇到重大阻礙。該階段嘅核心要求包括哈馬斯（Hamas）全面解除武裝、以色列軍隊逐步撤出加沙、建立由技術官僚組成嘅過渡當局，以及部署「國際穩定部隊」（International Stabilization Force）。不過，哈馬斯高級官員哈亞（Hayya）早前聲稱擁有「合法」嘅武裝權利，拒絕解除武裝，令談判陷入死胡同。

特朗普喺見面時強調，哈馬斯必須解除武裝，停火先可以進入下一階段。為了解決呢個難題，特朗普嘅特使維特科夫（Steve Witkoff）同佢女婿庫什納（Jared Kushner），喺今個月已經喺邁阿密會見咗卡塔爾、埃及同土耳其嘅代表。有消息指，美國官員正考慮一項類似「武器回購」嘅計劃，即係以現金獎勵換取哈馬斯交出武器。同時，關於組建多國「國際穩定部隊」嘅構想亦面臨挑戰。西方外交官透露，美國同以色列希望呢支部隊喺解除武裝方面發揮「指揮作用」，但歐洲同地區內其他國家就擔心咁樣會令部隊變成「佔領軍」，雙方喺授權細節上有好大分歧。

值得留意嘅係，內塔尼亞胡呢次訪美行程本身就極具外交爭議。雖然佢被國際刑事法院通緝，但根據全球航班追蹤平台FlightRadar嘅數據，佢嘅專機係毫無阻礙咁飛越咗希臘、意大利同法國領空進入大西洋，最後抵達美國。呢三個國家雖然都係《羅馬規約》嘅締約國，理論上有義務執行逮捕令，但喺現實中，各國往往會根據自身外交利益同雙邊協議去決定係咪配合，呢件事突顯咗ICC喺執行力上嘅局限。

同時間內塔尼亞胡今次由遇難人質格維利（Ran Gvili）嘅父母陪同訪美，以增取國際同情。以色列方面堅持，喺所有人質（包括生還者同遺體）歸還之前，和平協議嘅第二階段唔會全面啟動。格維利嘅父母喺佛羅里達州亦會見咗美國國務卿盧比奧（Marco Rubio）同國防部長赫格塞斯（Pete Hegseth），特朗普對此表示深切同情，並承諾會全力協助人質家屬。

此外，特朗普再次介入以色列國內政治，公開呼籲以色列總統赫爾佐格（Isaac Herzog）赦免正接受貪腐審判嘅內塔尼亞胡。內塔尼亞胡目前身負欺詐、背信同受賄等多項指控，係該國歷史上首位喺任內受審嘅總理。特朗普稱讚內塔尼亞胡係「戰時首相」同「英雄」，仲話「點可以唔赦免佢」。赫爾佐格辦公室隨後回應，指已經向特朗普嘅代表解釋咗赦免請求嘅處理程序，強調任何決定都會按照既定法律程序去做。

據了解，特朗普計劃喺明年1月於瑞士達沃斯（Davos）論壇期間，召集一個新嘅「和平委員會」去監督加沙過渡政府嘅成立。華盛頓方面希望盡快宣佈成立一個由巴勒斯坦技術官僚組成嘅非政治化政府，去管理加沙嘅日常事務，並為該區嘅戰後重建同埋以色列與阿拉伯世界關係正常化鋪路。然而，面對哈馬斯嘅強硬態度、伊朗嘅潛在威脅以及國際部隊組建嘅困難，呢場旨在實現中東長期穩定嘅外交努力，前路依然充滿變數。