加利福尼亞州（California）呢個「黃金之州」，最近因為一項針對超級富豪嘅「財富稅」提案鬧得沸沸揚揚。呢項名為《2026 億萬富豪稅法案》（2026 Billionaire Tax Act）嘅公投提案，建議向州內資產超過 10 億美元嘅超級富豪徵收一次性 5% 嘅財富稅。消息一出，隨即引發矽谷大佬同政壇嘅大地震，唔少富豪甚至威脅要喺 2025年底前「執包袱」搬離加州，以免被納入呢個巨額稅網。

根據呢項由醫療工會（SEIU-UHW）發起嘅提案，如果獲選民通過，所有喺 2026年1月1日仲住喺加州，淨資產過十億美元嘅億萬富豪，都會被課徵5%嘅稅。受影響嘅富豪預計只有約200人，但預計可以為州政府帶嚟高達 1,000 億美元嘅收入。

提案規定，呢筆稅款可以分五年畀，而90%嘅收入將會撥歸醫療體系，特別係用嚟填補因為聯邦撥款削減而出現嘅 Medicaid（醫療補助）財政黑洞。雖然支持者形容呢個係「及時雨」，可以保障基層醫療同教育支出，但對富豪嚟講，呢鋪真係「大出血」。

矽谷一班科技巨頭同創投大佬反應最激烈。Palantir 創辦人 Peter Thiel 同 Google 共同創辦人 Larry Page 等人，據報已經開始考慮喺今年尾（2025 年12月31日）之前離場。由於法案具有追溯力，只要喺2026年元旦當日仲係加州居民，就要硬食呢筆稅。

加密貨幣行業嘅領袖亦公開炮轟呢個政策。Bitwise 執行長 Hunter Horsley 指出，加州政府本身已經「大花筒」，審計報告顯示有數十億美元支出不明，而家唔去解決浪費問題，反而向創新者「開刀」，直言呢啲係對企業家嘅懲罰。亦有分析指出，好多富豪嘅財富都係來自未實現收益（Unrealized gains），即係股票升咗值但未賣出，如果硬要交稅，佢哋可能要被迫拋售公司股份，分分鐘搞到公司股價大幅波動，甚至失去控制權。

最令支持者尷尬嘅係，連一向立場偏左嘅加州州長紐森（Gavin Newsom）都公開唱反調。紐森多次表示，佢對財富稅持「堅決反對」態度。州政府分析辦公室（LAO）亦發出警告，指雖然短期內稅收會暴增，但長期嚟講，富豪集體外移會導致州政府永久損失數以億計嘅所得稅同資產增值稅，「得不償失」。

加州共和黨參選人亦趁機發火，鬧爆州政府對加稅「上癮」，將原本嘅創業天堂變成「富豪禁地」。

目前支持團體正喺度密鑼緊鼓收集簽名，目標係要喺2026年11月將提案交畀選民表決。呢場「階級對立」嘅爭拗，已經令加州嘅豪宅市場同企業規劃進入咗觀望期。究竟加州選民會選擇劫富濟貧，定係擔心「金雞」走晒會搞壞經濟？