台灣最大在野黨中國國民黨主席鄭麗文，今日早上接受電台節目專訪時表示，預計明年上半年將會出訪中國大陸同美國，但行程安排上，會以北京優先，再轉往美國，因為「美國太遠了」。與此同時，日本傳媒《讀賣新聞》報道，中國解放軍同北京科技公司，懷疑曾經聯手建置一套「輿論分析系統」，時間點正正係台灣立法院長韓國瑜競選高雄市長期間，目的被指係企圖干擾台灣選舉，甚至傳出已有涉及「人聲」嘅錄音證據。

鄭麗文喺專訪中強調，之所以將北京行程放喺最優先位置，係因為全世界都關注兩岸關係係咪仍然有可能回到十年前馬英九執政時期，當年以九二共識、反對台獨作為雙方對話嘅政治基礎。

佢表示，如果呢個基礎仍然存在，咁佢同中共中央總書記習近平嘅會面，本身就帶有非常重大的戰略意義同政治訊號，唔單止係對兩岸，亦係對國際社會。

鄭麗文提到，近日有部分媒體報道，指佢可能喺農曆年前後就展開所謂「鄭習會」。佢直言，呢啲講法完全係賴清德同綠營「幫佢排好嘅行程」，屬於政治操作。佢笑稱，如果真係照呢個講法，自己只剩返一個月時間就要同習近平會面，「準備時間都唔夠」，所以根本係無中生有。

鄭麗文亦提到，如果單純按照美方目前釋出嘅訪問邀請頻率，「我幾乎每個月都要去一次美國」，但現實上根本唔可能。佢再次強調，美國距離遠、時間成本高，所以寧願集中一次完成行程，至少要預留兩星期。

與此同時，日媒《讀賣新聞》報導，美國范登堡大學（Vanderbilt University）國家安全研究所今年取得一份文件，聲稱係北京大型企業「中科天璣」嘅內部資料。該文件係一份長達約 400 頁嘅簡報，內容提到，該公司「因應共產黨中央關切的香港、台灣、美中問題，提供情勢感知、分析及引導輿論的技術」。

報道指出，暗網上流出三段音檔，被指係解放軍同民間企業之間嘅私下對話，內容討論如何介入 2018 年高雄市長選戰，藉此推升韓國瑜嘅「韓流」聲勢。音檔中提及，解放軍「56所」投入 2000 萬人民幣作為助攻經費，甚至「搜控」台灣 1000 萬個帳號。針對相關指控，中科天璣已向《紐約時報》否認。