《香港經濟日報》今（29）日引述消息報道，中國央企中遠海運集團（COSCO） 副總經理張勇，已經正式出任香港中聯辦副主任。消息人士指出，張勇今次來港，唔只係一個人事調動咁簡單，其中一個重點任務，正正就係要處理 李嘉誠 家族出售巴拿馬等港口資產所引發嘅一連串爭議。

報道引述多名政商界人士分析，李嘉誠家族控制嘅長和集團，早前計劃出售包括巴拿馬港口在內、遍布全球合共 43 個港口資產，但相關交易目前仍然陷入膠着狀態。由於涉及資產規模龐大，加上背後牽連地緣政治同國家戰略層面，中遠海運被視為整宗交易入面一個極為關鍵嘅角色。有政商界中人直言，張勇此行來港，其中一個重要任務，就係要處理好長和呢場交易風波，為局勢降溫，同時為中央同市場之間搭橋鋪路。

消息又指出，長和出售港口資產，已經唔再係單純嘅商業買賣，而係涉及中國嘅國家利益同安全考量。中央政府對事件高度關注，並已經展開反壟斷審查程序。喺呢個背景之下，中遠海運其後獲邀加入收購行列，角色由旁觀者，變成交易入面嘅核心協調者之一。

公開資料顯示，張勇自 2023 年 9 月起出任中遠海運副總經理兼黨組成員，同時擔任集團總法律顧問，屬於熟悉央企運作、政策法規同企業治理嘅核心高層。再睇返佢過往履歷，張勇長期喺中央層面任職，曾經出任中央財經領導小組辦公室經濟二組副巡視員、經濟四局副巡視員同副局長，其後升任中央財經委員會辦公室經濟二局局長，以及秘書局長（兼管人事工作）、機關黨委常務副書記等要職，對國家宏觀經濟政策、產業安全同重大交易背後嘅政治敏感度，都有相當深厚嘅經驗。

喺呢個背景之下，張勇轉任香港中聯辦副主任，被外界解讀為帶住任務落區。有熟悉內情人士形容，呢類人事安排，往往反映中央希望透過一個既熟悉央企實際運作、又深諳政策邏輯嘅人選，喺香港協調政商利益，處理高風險、高敏感度嘅交易，確保最終結果唔會偏離國家整體戰略方向。

報道亦提到，長和出售巴拿馬等港口嘅交易，原本計劃喺今年 3 月完成，整體涉資高達港幣 228 億元。不過，隨着反壟斷審查同各方博弈升溫，交易進度明顯放慢。早前更有消息傳出，中遠海運最新提出嘅條件，係希望喺收購財團中持有多數股權，意味整個交易架構可能要作出重大調整。