法廣報導，曾長期主導中國計劃生育政策嘅中共前高官彭珮雲，證實於12月21日喺北京病逝，終年96歲。中國官媒新華社形容佢係婦女兒童工作嘅傑出領導人，但相關消息喺社交平台上並無引發廣泛悼念，反而觸發大量網民不滿與聲討，矛頭直指佢當年推行嘅強制墮胎措施，更有人留言詛咒：「那些赤裸身亡的孩子，正在另一邊等着你。」

彭珮雲喺1988年至1998年間出任國家計劃生育委員會主任，正值獨生子女政策執行最嚴厲嘅階段。當年，多地基層官員以強制方式落實政策，迫使婦女接受墮胎同絕育，成為唔少家庭至今仍然揮之不去嘅時代噩夢。死訊傳出後，內地社交平台微博上幾乎見唔到哀悼聲音，反而充斥對嗰段歷史嘅嚴厲批評，有網民直言，如果一胎化政策少實施十年，中國人口未必會跌到今日咁嘅局面，亦有人感嘆，嗰啲未能出世嘅孩子，如果仍然在生，依家都接近40歲，正值人生黃金時期。

喺彭珮雲主政期間，部分農村地區為求延續香火，溺棄女嬰、選擇性墮胎女胎情況屢見不鮮，最終造成嚴重嘅人口性別失衡。雖然佢喺2010年代晚年曾公開表示應該放寬相關政策，但對於唔少中國家庭而言，所造成嘅傷害早已形成，難以逆轉。

報道指出，網民怒火背後，折射出中國正面對愈來愈嚴峻嘅人口危機。中國人口喺2023年被印度超越，其後一年再度下滑至約13.9億，並且已連續三年錄得負增長。有專家警告，人口收縮趨勢未來幾年可能進一步加快。北京當局近年轉而推出育兒補貼、延長產假等措施刺激生育，與過去嚴厲壓制出生形成強烈反差。

彭珮雲生前仕途順遂，曾出任國務委員及全國人大副委員長，但喺國際層面同樣爭議纏身。2013年，西班牙國家法院曾向包括彭珮雲在內嘅5名中共前高官發出逮捕令，指控佢哋涉嫌喺西藏犯下種族滅絕罪行。按中共官方估算，長達約40年嘅計劃生育政策，令中國累計少出生約4億人。