法國《BFM》財經電視台周一（22日）引述法新社同多個國際消息來源報道指，隨着全球戰略格局急速轉變，世界正一步步走入一個全新、而且更加危險嘅核軍備周期。喺美國、俄羅斯同中國逐漸形成「三邊格局」之下，2026年好大機會會成為全球核軍控體系被重新定義、甚至被徹底重組嘅一年。

更值得警惕嘅係，路透社近日披露一份仍屬草案階段嘅五角大樓內部報告，指出中國好可能已經喺最新建成嘅三個導彈發射井群入面，實際部署超過100枚洲際彈道導彈，而北京至今完全冇表現出任何參與軍控談判嘅意願。

法國戰略研究基金會（FRS）核政策專家埃馬紐埃爾．邁特（Emmanuelle Maitre）接受法新社訪問時直言：「而家嘅軍控架構，係一塊一塊噉崩落緊。」佢形容，問題唔只係單一條約失效，而係整套冷戰後建立起嚟嘅制度性秩序，正面臨瓦解。

隨住地緣政治緊張局勢持續升溫，2026年唔單止未必會迎來任何軍控突破，反而有可能見證國際核軍控機制進一步停滯，甚至出現實質性崩潰。

美國權威智庫《原子科學家公報》主席亞歷山德拉．貝爾（Alexandra Bell）喺12月初已經發出警告，話今次審議大會「將會非常艱難」，而整個軍控體系嘅前景，「可以話係前所未有噉黯淡」。

中國雖然目前核武庫存仍然比美俄少，但北京一直拒絕加入任何形式嘅三邊裁軍對話。彼得斯喺12月中旬一場研討會上聲稱：「中國係全球核力量增長最快嘅國家，每年新增大約100枚核彈頭，而家擁有嘅洲際彈道導彈發射井數量，已經超過美國。《新削減戰略武器條約》根本解決唔到呢個問題。」

不過，專家亦指出，條約到期之後，唔代表即刻出現核軍備「爆炸式回升」。邁特分析話，華盛頓同莫斯科仍然有一啲空間，可以重新啟用部分儲存武器，但受制於產能同工業瓶頸，短期內核力量回升速度唔會太快。

路透社另引述五角大樓一份內部報告草案指出，中國好可能已經喺靠近中蒙邊境嘅新建導彈發射井入面，實際部署超過100枚「東風-31」（DF-31）固體燃料洲際彈道導彈。該區被視為中國最新一批導彈發射井群嘅一部分。

美國方面早前已經確認呢啲發射井嘅存在，但今次報告係首次嘗試評估其實際裝彈數量。報告同時提到，喺正式提交國會之前，相關內容仍然有可能作出修改。

五角大樓評估顯示，中國喺2024年嘅核彈頭儲備大約維持喺600枚左右，反映導彈生產速度比前幾年略為放緩。不過，整體核擴張趨勢並冇逆轉。按現時推算，到2030年，中國核彈頭數量好可能會突破1000枚，正式踏入同美國、俄羅斯並列嘅「戰略核大國」行列。

喺多邊軍控機制持續失靈之下，國際社會正步入一個「規則退場、風險上場」嘅新時代，而2026年，很可能只係呢場長期核博弈真正嘅開始。