美國三藩市上周六（12 月 20 日）發生大規模停電事故，正值城市高度依賴科技與自動化系統運作之際，事件即時暴露出自動駕駛技術在極端情境下嘅現實限制。

停電期間，大量由 Waymo 營運嘅無人駕駛的士喺街頭出現混亂情況，多條主要道路交通癱瘓，畫面喺社交平台瘋傳。雖然相關服務已於翌日（21 日）逐步恢復，但事件已被競爭對手趁勢放大，成為自動駕駛路線之爭嘅一個縮影。

今次停電影響範圍相當廣泛，約有十三萬名太平洋瓦電公司用戶受波及，大量交通燈及道路控制系統失效，令市內多個繁忙十字路口陷入無序狀態。

網上流傳多段影片顯示，多輛 Waymo 自動駕駛車輛喺冇交通燈指引之下停滯不前，部分車輛甚至喺路口「呆住」，進一步加劇原本已經嚴重嘅交通擠塞。Waymo 發言人事後回應指，公司正針對類似大規模基建失效嘅情況調整技術設定，以提升系統喺非常態環境下嘅應變能力。

事件發酵期間，Tesla 行政總裁 伊隆・馬斯克 隨即喺社交平台「抽水」，高調表示自家 Robotaxi 並未受到今次停電影響，言下之意直指競爭對手系統過於依賴外部基建。

雖然 Tesla 同 Waymo 同樣角逐自動載客服務市場，但兩者技術路線存在明顯分歧。Waymo 主要依賴光學雷達、毫米波雷達、攝影機，以及高精度地圖整合系統，相關數據需要持續上傳同更新，意味一旦城市環境或基礎設施出現突變，導航與判斷能力便可能受到影響。

Waymo 隸屬於 Alphabet Inc.，早於 2018 年已喺鳳凰城都會區推出商業化自動駕駛的士服務，並透過同 Uber 合作，將業務擴展至奧斯汀及亞特蘭大。不過，Waymo 發展過程並非一路順風。

今年 5 月，公司曾因部分自駕車在行駛期間碰撞鏈條或路邊柵欄，召回超過一千二百輛車作軟件更新；近期又因在三藩市撞死一隻貓而引發市民不滿，再次令公眾對自動駕駛安全性產生質疑。

與此同時，市場焦點亦落喺 Tesla 嘅基本面表現之上。德意志銀行 分析師 Edison Yu 預期，Tesla 在 2025 年第四季嘅交付量，將低於市場普遍預期，亦低於該行早前嘅估算。

Yu 指出，交付量下滑主要來自美國同中國兩大市場，反映全球電動車需求正進入調整期。不過，他同時強調，市場對 Robotaxi 長線發展仍然保持高度期待，成為支撐 Tesla 長期估值嘅核心因素之一。

根據 Investing.com 報道，德意志銀行預測 Tesla 第四季交付量約為四十萬五千輛，按年下跌約 14%，較上一季更大幅回落 19%。Yu 進一步指出，交付量不足主要集中喺 Tesla 傳統嘅西方核心市場，其中歐洲同北美市場交付量，預計將分別下跌 34% 同 33%。至於中國市場，雖然同樣面對下行壓力，但跌幅相對溫和，德銀預測約為一成。