內地樓市持續低迷，官方同時收緊相關言論同資訊流通。北京市住房和城鄉建設委員會公布，近日多個部門就房地產網絡內容問題，聯合約談多個大型網上平台，包括抖音、小紅書、貝殼、58同城、閒魚、鏈家、我愛我家同麥田等，要求全面整頓涉及北京樓市嘅網上訊息。

官方表示，部分自媒體帳號同網上內容，長期喺平台發布或者轉載唱衰北京樓市、誇大市場風險、製造恐慌氣氛、臆測政策走向，以及透過虛假房源引流等訊息，對市場秩序造成干擾。有關部門要求平台即時展開全面自查，下架違規內容，處理涉事帳號，並加快建立常態化內容內審機制，加強行業自律。

喺相關部門督導之下，多個平台已經展開清理行動。截至本月中，抖音、小紅書、58同城、貝殼、閒魚等平台，合共清理超過一萬七千條涉及違法違規同不良內容嘅訊息。平台亦處理咗一批房地產類帳號同直播間，包括「北京公寓」、「老李談京房」、「銳哥金融視野」、「北京海哥看房」等，被指存在放大市場波動、販賣焦慮、誤導預期、以虛假內容博流量促成交嘅問題，合共超過二千三百個帳號同直播間被清理或限制，另外亦刪除咗一百多篇違規筆記。

除咗社交平台，房產中介相關網站同樣成為整治對象。鏈家、我愛我家、麥田等平台，合共篩查超過一百三十萬條網上房源資訊，下架或者整改唔合規房源訊息四百幾條。官方強調，相關行動目的係淨化網絡生態，防止不實資訊影響市場預期。

喺宏觀層面，中國經濟表現疲弱，官方近年明確要求加強輿論引導，強調要唱響「經濟光明論」。抖音早前公布《抖音社區財經行業公約（試行）》，要求財經內容創作者完成專業資質認證，未經認證帳號唔可以發布專業分析或者推薦相關服務，同時禁止惡意唱衰經濟發展。

房地產市場方面，資訊收緊唔止局限於網絡內容。據報，上月內地官員已要求多家民間研究機構暫停發布住房銷售數據。一向被市場視為樓市風向標嘅克而瑞同中指研究院，上月底同步未有公布房企月度銷售排行榜，打破多年慣例。

德國之聲早前引述內地房地產數據指出，10月百強房企新房銷售額按年急跌約四成二，創十八個月以來最大單月跌幅。隨住住房銷售持續大幅下滑，至11月，有關部門進一步要求民間數據機構停止對外發布相關銷售數字。

美奇金投資諮詢公司（J Capital Research）創辦人兼研究主管楊思安（Anne Stevenson-Yang）表示，停止公開數據有助掩蓋實際樓價跌幅。佢指出，整體樓市跌幅好可能已經接近一半，喺市場重新達到平衡之前，樓價仍然有進一步下探空間。

有業內人士話，以往市民觀察樓價升跌同房企實力，主要都係睇克而瑞、中指研究院等民間機構嘅排行榜同數據，相關資料亦係發展商融資、銀行批貸嘅重要參考。依家數據突然中斷，令市場透明度大減，買樓人士等同跌入資訊盲區。

亦有業界人士指出，民間機構近年收集數據越嚟越困難。以前唔少房企願意畀錢買排名同數據服務，但喺銷售下滑同債務壓力之下，有啲企業連基本營運都成問題，廣告費都未必交得起。當數據表現愈嚟愈「難睇」，一旦如實公布，可能會進一步加劇市場恐慌。

有意見認為，現階段應該由官方統一公布更真實同完整嘅市場數據，包括各城市樓價指數、房企資金鏈狀況、土地出讓情況等，令市場參與者有清晰參考，避免過度依賴零散同非正式渠道嘅資訊。