高等法院原訟法庭尋日（15日）裁定，壹傳媒創辦人黎智英以及《蘋果日報》旗下三間公司，被控嘅「串謀勾結外國或者境外勢力危害國家安全」同「串謀刊印、發布、出售、要約出售、分發、展示及／或複製煽動刊物罪」共三項控罪，全部罪名成立。

美國總統特朗普對於今次判決表示難過，並主動提到佢曾經親自向中國國家主席習近平要求，考慮釋放黎智英。當被記者問到：「總統先生，黎智英今日（星期一）喺香港被判罪成，你有咩回應？」特朗普就話：「我真係感到好難過。我之前已經同習近平主席傾過，要求佢考慮放咗黎智英，佢已經係老人家，健康又唔係咁好，所以我提出呢個要求，咁我哋再睇下件事最終會點樣發展。」

另一方面，特區政府今日（16日）發表聲明，強烈譴責香港記者協會（記協）同一啲所謂「反華外國媒體」，話佢哋無視法庭根據法律及證據，嚴格依法裁定黎智英等人有罪嘅事實，仲企圖誤導市民，為黎智英「刻意洗白」，將佢包裝成民主象徵，掩飾黎智英長期操控媒體煽動市民、出賣國家同人民利益、配合外部勢力滲透同向年輕人洗腦嘅「無恥顛覆行為」。

特區政府發言人狠批記協「冇公信力、冇認受性、冇代表性」，仲一直唔肯公開佢哋新一屆執委嘅名單，咁嘅組織竟然仲自詡為香港新聞界嘅代表，實在令人不齒。

發言人強調，記協一直以來都同「反華外國媒體」狼狽為奸，長期故意誤導市民，刻意將「黎智英案」涉及嘅犯罪行為同新聞自由扯埋一齊，更加喺唔同案件中炒作，詆毀香港嘅人權同法治狀況，明顯係想混淆視聽，污衊特區，令香港市民受到蒙蔽。狠批呢啲係極度卑劣嘅政治操作，必須予以最強烈嘅譴責。

發言人又指出，記協發表大量誤導同失實言論，完全冇尊重特區法庭基於事實同證據所作出嘅獨立裁決，拒絕正視判決中詳列嘅各項證據，唔理法庭裁決背後嘅理據，就肆意「污衊」特區政府，公然踐踏香港嘅法治精神，將政治凌駕法治，明顯係歪曲事實、顛倒是非云云。

發言人最後呼籲記協以及其他「反華外國媒體」，「及早認清事實，回頭是岸」，立即停止替外國勢力進行滲透，以及對香港年輕人進行洗腦嘅顛覆工作，又話特區政府絕對唔會姑息任何煽動大眾、出賣國家利益嘅行為。