美國太空軍高層近日發出罕見警告，指中國同俄羅斯正大力研發衛星匿蹤技術，令其衛星更難俾雷達同光學望遠鏡偵測。呢股新趨勢意味住太空對抗模式正悄悄轉型，由以往嘅「你睇住我、我盯住你」，變成更隱蔽嘅「捉迷藏」，太空戰場嘅競爭亦愈趨激烈。

喺「太空力量2025」（Spacepower 2025）會議上，美國太空軍首席士官長 Ron Lerch 表示，太空軌道對抗已經出現明顯轉變。「過去幾年，我哋成日講 GEO（地球同步軌道）上嘅貓捉老鼠，美、中、俄互相跟蹤。但過去一年，喺低地球軌道（LEO）更似喺玩 ( Hide and Seek ) 捉迷藏。」佢指出，對手正透過降低雷達截面積（RCS）或調低視覺亮度，令衛星做到近乎「隱形」。

Lerch 特別點名中國嘅「試驗-24」（Shiyan-24）系列衛星。三顆 LEO 衛星（A、B、C）曾進行同步機動，美國太空軍副作戰部長 Michael Guetlein 將軍早前形容為「太空纏鬥」。有趣嘅係，三顆衛星嘅雷達截面積由大到小逐級減少，顯示中國正按部就班推動一項跨越數十年嘅研究計畫，將匿蹤技術真正帶入太空。Lerch 指出，衛星唔止難以用肉眼追蹤，連幾何設計都刻意壓低雷達回波，反映中國喺材料科學、結構設計同塗層方面嘅持續突破。

相比之下，俄羅斯就更著重光學層面嘅隱形技術。Lerch 提到，俄方最近喺中地球軌道（MEO）部署咗一顆名為「Mozhayets」嘅實驗衛星，其視覺亮度低到驚人。以視星等衡量，一般 MEO 嘅 GPS 衛星大概係 6.5，但呢顆 Mozhayets 嘅視星等竟然高達 16，暗得幾乎捉唔到。更耐人尋味嘅係，呢顆 Mozhayets-6 喺 2025 年 9 月跟住 GLONASS 衛星升空後，竟然喺太空「消失」咗差唔多五個星期，美國公開軌道資料庫完全無記錄，最後係靠商業公司先搵得返。

面對中俄匿蹤技術一日千里，美國太空軍愈來愈依賴商業界嘅支援。Lerch 坦言，冇商業數據，好多活動根本唔可能喺非機密場合討論。中國試驗-24 嘅軌道資料主要由 LeoLabs 提供，而俄羅斯 Mozhayets 嘅關鍵資訊則來自 Slingshot。後者甚至喺 2025 年 11 月公開話係佢哋率先捉到衛星蹤跡，突顯商業機構喺太空監控中角色愈來愈重要。

太空匿蹤化嘅趨勢已經引發美軍高度戒備。不論係塗層、材料抑或幾何設計，中俄嘅技術突破將令太空監控工作面臨更大挑戰。為保住感測優勢，美國太空軍正加速整合商業數據、研發新型感測器同反制方案，尤其喺 LEO 衛星爆炸性增長，以及對手隱形能力提升嘅雙重壓力下。

專家認為，衛星匿蹤技術係應對軍事需求演變而生。傳統衛星太容易俾敵方盯上，匿蹤能提高生存力，仲可以支援突襲、偵察等任務。但呢種技術亦可能推高太空軍備競賽風險，增加誤判同衝突升級嘅可能性。美國太空軍官員呼籲國際社會提升太空透明度，同時加速本土創新，以免喺新一輪太空競賽中落於下風。