美國聯邦眾議院以312票對112票通過參、眾兩院協商後嘅最新版本《國防授權法案》（NDAA），當中最受外界關注嘅，係向「台灣安全合作倡議」撥出 10 億美元全額資金；授權美軍持續訓練台灣部隊，抵禦中國軍事施壓；並要求五角大廈同台灣建立「無人系統及反無人系統」聯合計劃。法案下一步將提交參議院表決，最後由特朗普（Donald Trump）簽署生效。

美國國會每年都要通過《國防授權法案》，先由眾院同參院各自表決一個版本，再交由兩院軍事委員會「傾掂」統一版本，之後再交返兩院表決。今次 2026 財政年度版本喺兩院反覆角力後於 7 日公布，而眾議院今日率先通過。

眾院軍事委員會主席羅傑斯（Mike Rogers）發新聞稿形容，《國防授權法案》反映「美國正處於二戰以嚟最複雜嘅安全環境」，又強調今次法案「落實特朗普總統以實力換取和平嘅議程」，確保美軍維持全球最具殺傷力、最有戰力嘅部隊。

根據眾院軍委會公布嘅摘要，今次法案核心圍繞「抗衡中國威脅、確保印太任務成功、同支持印太盟友夥伴」。其中涉台內容比往年更具體，包括：

— 向「台灣安全合作倡議」提供 10 億美元全額經費；
— 授權美軍持續訓練台灣軍隊，同其他印太夥伴，提高抵禦中國軍事侵擾同「惡意影響力行動」嘅能力；
— 要求五角大廈於 2026 年 3 月 1 日前，與台灣啟動「無人系統／反無人系統」聯合計畫，包括共同研發、共同生產，供美軍同台灣軍隊共同使用；
— 要求制定美台海巡整合訓練計畫，增派美國海岸防衛隊訓練小組赴台，提升台灣海事安全、執法同嚇阻能力。

新版法案內容進一步要求，美國戰爭部（即國防部）需提交 「台灣安全援助路線圖」，列出一套多年期計畫，滿足台灣軍隊防衛需求；並研究是否為台灣建立「區域應變儲備庫」（regional contingency stockpile）。換句話講，美國正考慮喺台灣周邊建立類似前線軍備倉庫嘅制度化配置。

值得留意嘅係，法案亦夾帶一項具有象徵意義嘅《不歧視台灣法案》（Taiwan Non-Discrimination Act），要求美國在國際貨幣基金（IMF）內支持台灣加入或參與相關機制，反映華府加快在金融治理層面推動「提升台灣國際地位」。