烏克蘭總統澤連斯基表明，只要美國與歐洲國家能為選舉進行提供足夠安全保障，烏克蘭願意喺60至90日內舉行全國大選，包括總統與國會選舉。他表示，已要求執政嘅「人民公僕黨」議員加快處理相關法律修訂，但強調最大障礙係憲法規定：國會選舉只能喺戒嚴解除後先可以舉行，而戰時亦不得修憲。

自2022年2月俄羅斯全面入侵以嚟，烏克蘭多次延長戒嚴與戰時狀態，所有選舉依法暫停。澤連斯基嘅五年總統任期本應於2024年5月屆滿，國會任期亦在同年8月結束；但喺戒嚴之下，由現任政府繼續履職，喺國際法與比較政治當中都屬普遍做法。

面對外界批評佢「戀權」或「拖延選舉」，澤連斯基嚴正否認，指此類說法「完全不恰當」。佢反駁表示，烏克蘭自1991年獨立後已有六位民選總統遠超同期俄羅斯只有兩位領導人，足以說明烏克蘭民主制度嘅成熟與韌性。

今次表態亦正值美國總統特朗普多次公開質疑烏克蘭民主正當性。特朗普早前接受《Politico》專訪時批評，烏克蘭以戰爭作為理由長期不舉行選舉，「去到某個時候，就唔再算係民主」。佢甚至用上「冇經過選舉嘅獨裁者」來形容澤連斯基。

對於特朗普嘅指責，澤連斯基回應指烏克蘭願意恢復選舉，但西方必須協助解決三大現實挑戰：首先係如何保障投票站免受俄軍導彈與無人機攻擊；其次係防止俄羅斯情報部門干預選舉，或喺佔領區打造親莫斯科政權；再者係如何確保離散歐洲嘅約580萬難民同仍喺俄軍佔領區嘅選民擁有安全而可行嘅投票渠道。

烏克蘭官員私下承認，若要喺戰時倉促舉行選舉，可能需北約部隊或歐安組織（OSCE）大規模派員監察選舉，甚至考慮部分地區改爲線上投票，但後者將面對俄羅斯網絡攻擊風險，變成另一場資訊戰。

觀察人士認為，澤連斯基此時釋出選舉訊號，既係回應特朗普嘅公開質疑，同時亦係向朗普政府示好。特朗普競選期間多次表示，上任後會推動快速停火，甚至可能把「要求烏克蘭大選」列作談判條件之一。

目前，美國國務院與歐盟仍未正式回應澤連斯基嘅最新表態。歐盟外交與安全政策高級代表卡拉斯（Kaja Kallas）僅重申，歐盟尊重烏克蘭喺戰時維護憲制秩序嘅選擇，並會持續提供軍事與人道支援。

喺基輔街頭，民意明顯分裂。有市民擔心戰時選舉會帶來更大混亂，亦可能讓親俄勢力鑽空子；但亦有人認為，愈早恢復選舉愈能重建澤連斯基政府嘅民主認受性。