就喺早前美國特朗普政府公布國安策略將重點放在美洲之際，中國政府今（10)日突然公布《中國對拉丁美洲同加勒比政策文件》，強調要全面推動中拉關係邁向新台階，重新勾勒北京在全球南方布局嘅戰略方向，甚至不點名批評美國嘅「單邊霸凌行徑」，顯示中方力圖介入美國傳統勢力範圍。

呢份文件係中國繼2008年同2016年之後第三次就拉美政策發正式文件。首份版本喺胡錦濤出訪拉美前夕公布，提出建立「平等互利、共同發展」嘅全面合作夥伴關係；2016年第二份文件則進一步擴大合作範圍至產能、基建、能源同金融等領域，配合「一帶一路」喺海外推展嘅節奏。

今次第三份文件喺措辭上明顯更著重「百年未有的大變局加速演進」，指國際力量對比正做緊深刻調整，而全球南方喺國際舞台上嘅角色正愈嚟愈重要；文件亦提到，世界經濟動力不足、局部衝突頻仍、「單邊霸凌行為增加」，令全球面臨前所未有嘅挑戰。

文件指出，作為發展中國家同全球南方一員，中國一直同拉美同加勒比地區「同呼吸、共命運」。今次政策文件嘅目的，係希望總結中拉過往合作經驗、規劃未來方向，並透過制度化方式推動雙方關係全面升級。北京今次提出嘅「中拉命運共同體五大工程」，涵蓋團結、發展、文明、和平同民心，當中包括深化高層互動、相互支持對方核心利益、加強政府間磋商、落實全球發展倡議、推動貿易投資合作，以及喺文化、科技、綠色轉型等領域擴闊合作。

較早前，美國白宮喺12月5日公布特朗普（Donald Trump）第二任期首份《美國國家安全戰略》，再次將「門羅主義」清晰寫入美國最高層級嘅國安指導文本，並公開將「西半球」列為華府最優先處理嘅戰略焦點。

呢份長達29頁嘅文件，被視為特朗普2.0時代全球戰略布局嘅最終藍圖，完整呈現佢「美國優先」底下嘅外交取向同優先次序。文件直指，美國必須重新掌控西半球嘅主導權，以免中國、俄羅斯等外來勢力進一步深化喺拉美嘅影響，同時透過軍事手段加強邊境安全、阻截非法移民、壓制跨國毒梟。

喺軍事部署方面，特朗普新版國安戰略要求徹底重整美軍喺西半球嘅軍事存在，包括把部分駐外兵力由「重要性下降」嘅戰區，例如中東同歐洲部分地區調返美洲，從而強化美國本土周邊嘅戰略縱深；加強海岸防衛隊同海軍喺加勒比海同太平洋附近嘅部署，用作控制主要航道、阻截非法移民船隻、打擊跨國販毒集團，並喺危機爆發時即時掌握區內關鍵海域。

文件又指美國將同時喺美墨邊境及部分拉美區域部署針對性軍力，必要時可以動用「致命武力」，徹底否定過去以執法合作為主嘅做法。文件亦提出擴建或新增具關鍵地理位置嘅前沿基地，並同區內國家爭取軍事通行權，以確保美軍喺任何潛在危機出現時可以快速介入。

中國同美國兩份政策文件幾乎同步登場，顯示兩國喺拉美地區嘅戰略角力正加速升級，相信拉美國家未來勢必需要喺經濟合作同安全壓力之間作出更微妙嘅平衡。