中國今年嘅年度貿易順差首次突破一萬億美元大關，而且仲未計埋12月嘅出口數字。《法廣》引述法國《世界報》指，呢個驚人數字正好證實咗歐洲一路以嚟對「中國傾銷全球」嘅憂慮並非杞人憂天，而係一個正在形成嘅經濟現實。

《世界報》指出，呢個突破性嘅順差，已經喺全球主要市場引起高度警惕，印證咗外界一直講嘅「中國出口海嘯」正持續向世界各地湧去，歐美亞洲各主要經濟體都無法無視呢股壓力。

《世界報》分析話，雖然中國對美國出口持續下滑，但中國製造業嘅產品仍然向全球其餘地區以巨大規模輸出。根據中國海關總署12月8日嘅最新數據，11月中國出口按年增長5.9%，但進口只係升1.9%，兩者增速差距顯著拉闊。

報道形容，中國正積極搵新市場，目的係吸收國內遠遠超出內需嘅龐大產能。而過剩產能正係法國總統馬克龍本月3日至5日訪華期間會談嘅核心議題之一。

馬克龍喺12月7日接受《回聲報》訪問時直言：「我已經同中方講清楚，如果佢哋唔採取行動，未來幾個月，歐洲將被迫採取強硬措施……包括好似美國咁，對中國商品加徵關稅。」

《世界報》指出，美國總統特朗普喺今年4月已因同樣理由，大幅提高對中國進口商品關稅，北京亦立即進行報復。最新數字顯示，美國嘅行動雖然反覆，但確實「擋到一截」：今年頭11個月，中國對美出口按年大跌18.9%，同期從美國嘅進口亦跌13.2%。

中國出口就轉頭湧向歐盟同東盟。今年前11個月：中國對歐盟出口按年升 8.1%，從歐盟入口反而跌 3.5%，對東盟出口更急升 13.7%。報道指出，部分流向東盟嘅中國貨，最終實際目的地其實係美國；中國企業喺越南、柬埔寨等地設廠組裝，再以第三國身份出口，以避開美國加稅。

《世界報》直言，歐洲及多個地區愈來愈覺得自己變成咗中國處理過剩產能嘅出口管道。文章引述專家警告，中國嘅增長模式根本無變，經濟仍然極度依賴出口。今年中國經濟增長，有四成直接來自出口。而中國出口結構嘅巨大變化，尤其體現在汽車行業。曾幾何時，汽車係由歐洲出口到中國；而家完全反轉——中國車大量湧入歐洲，歐洲品牌喺中國市場卻節節下滑。

歐洲希望同中國達成「再平衡」，即中國增加內需、減少傾銷式出口。但法國戰略研究基金會中國問題專家瓦萊麗・尼凱直指：「對中國同中共嚟講，過剩生產係政權生存問題。減少出口、調整經濟結構，可能引發政治風險，甚至政權更迭，習近平唔會接受。最終，中國遲早一定要變革，但幾時、點變，無人知道。甚至可能係突然崩潰式變化。」

剛結束嘅中共政治局會議，部署2026年經濟工作，會議由習近平主持。其中特別提出新表述：「更好統籌國內經濟工作和國際經貿鬥爭」。

連向來對華友善嘅馬克龍都直斥，中國出口狂飆「攸關歐洲工業生死」。但政治局會議嘅基調顯示，北京無意調整模式，反而準備「迎戰」。

北京至今拒絕承認存在過剩產能問題，反而將全球反彈歸咎於他國：單邊主義、保護主義抬頭；霸權主義、強權政治威脅加劇；全球經貿秩序受到衝擊；世界經濟動能不足；大國博弈升級云云。