美國總統特朗普政府近日積極推動同俄羅斯展開談判，希望為烏克蘭戰爭尋找落幕機會；不過，多名歐洲領袖對華府嘅意圖表示質疑，擔心美方或有意向俄羅斯總統普京作出讓步。《明鏡周刊》取得嘅一份電話會議紀錄顯示，德國總理默茨、法國總統馬克龍等人均對正在進行嘅美俄談判存疑。

早前，美國宣佈暫停部分針對俄羅斯能源企業盧克石油公司嘅制裁。美國財政部表示，有關豁免旨在確保盧克石油於俄羅斯境外嘅加油站可以繼續營運，避免令消費者同供應商受影響，條件係相關收益不得匯返俄羅斯。豁免有效期至2026年4月29日。

美國特使維特科夫近日於莫斯科與普京會面，形容會面「非常好」。特朗普亦形容美俄會面「非常好」，又稱普京希望「結束戰爭」。普京現正訪問印度，佢接受當地電視台訪問時形容，現階段談判「複雜」，但需要投入努力，而唔係阻撓。他表示，相信特朗普係「真誠努力」，並暗示外界，尤其部分歐洲國家，正試圖拖慢談判進度。

《明鏡周刊》報道指，馬克龍喺周一與多名歐洲領袖及烏克蘭總統澤連斯基通話時指出，美國有可能喺領土問題上「出賣烏克蘭」。不過愛麗舍宮其後否認總統使用過「背叛」一詞，強調官方紀要並無相關措辭。同一通話中，默茨亦向澤連斯基表示，「未來幾日一定要非常小心」，更指「美國人在耍你，也在耍我們」。德國總理府拒絕回應，重申唔會披露任何機密對話內容。

芬蘭總統斯圖布亦被指對美方行動存疑，認為烏克蘭及澤連斯基唔應獨自面對美國派往莫斯科嘅談判代表，包括特朗普特使維特科夫，同總統女婿庫什納。北約秘書長呂特亦喺通話中表示：「我們必須保護澤連斯基」，北約對相關引述不予置評。

烏克蘭總統顧問利特文回應指，唔會評論「挑釁性」報道。《明鏡周刊》亦表示，兩名參與通信嘅人士確認相關引述準確，但拒絕具名，原因係通話屬機密。美國早前於11月提出過一份被形容為「對莫斯科極為有利」嘅初步方案。雖然其後有所修訂，但談判至今仍未見突破。