一名隸屬警方國安處、39歲嘅休班男警，今年年初喺港鐵站被指偷拍女子裙底，涉嫌拍攝對方私密部位。其後佢被帶返尖沙咀警署調查期間，竟然疑似情緒失控，企圖搶奪同袍身上嘅配槍，情況一度失控。涉事警員其後被落案控告兩項罪名，包括非法拍攝私密部位同企圖無牌管有槍械。案件昨日（4日）喺區域法院再提堂，辯方代表表示被告將會認罪。法庭把案件押後至明年6月29日，喺西九龍裁判法院正式答辯及求情，其間被告需繼續還押。

被告高振宗（39歲），報稱警員，面對兩項控罪：一是非法拍攝或觀察他人私密部位，二是企圖無牌管有槍械。控方案情指出，2025年1月15日，高振宗涉嫌喺尖沙咀港鐵站搭扶手電梯時，出於「觀察或拍攝女子X私密部位」嘅意圖，操作相關設備，試圖從女子X嘅衣物底下拍攝其私密部位。控方強調，被告行為涉及性目的，或者係一種不誠實動機，並無理會女子X是否同意。其後同日，被告喺尖沙咀警署報案室內，疑似企圖搶奪警槍，從而構成企圖無牌管有槍械罪行。

案件曝光後，再次引起外界對「休班警」嘅討論。根據《香港網絡大典》對「休班警」嘅介紹，休班警員近年屢屢因為涉及非禮、偷窺、盜竊、醉駕甚至傷人等案件見報，引起網民強烈不滿。不少網民指，只要喺網上搜尋「休班警」，就會出現大量涉及休班警員嘅罪案紀錄，有人更嘲諷「休班警係香港最大嘅犯罪集團」。

早於2017年，網絡媒體《熱血時報》就曾經將香港警務人員嘅犯罪紀錄，包括大量休班警嘅案件，輯錄成書，書名為《有種罪犯叫休班警察》，揭示相關問題嘅嚴重程度。其後喺2017年1月25日，時任警務處處長盧偉聰回應事件時，批評相關媒體，並指出警方一直有為巿民作出貢獻，例如做義工、以及為非華裔及少數族裔提供協助等。對於盧偉聰嘅說法，《熱血時報》當時亦曾發文反擊，並反建議盧處長應該先買返本書，好好了解其下屬涉及嘅罪行，從中警惕同提醒警員不要重蹈覆轍。