韓國總統李在明今日發表咗一個對國民嘅特別聲明，紀念舊年同日發生嘅「緊急戒嚴」風波一周年。佢喺聲明入面讚揚韓國民眾以和平方式抵抗不法嘅戒嚴命令，展示出韓國民主制度嘅驚人韌力，仲話韓國值得拎諾貝爾和平獎。為咗表彰國民嘅勇氣同行動，李在明拍板定案，將每年嘅十二月三號訂為「國民主權日」，並且將佢納入法定公眾假期，等全體國民可以一年至少有一日回顧呢件大事。

舊年十二月三號，當時嘅總統尹錫悅突然宣布全國實施緊急戒嚴，試圖解散國會、拉攏政敵同控制傳媒。呢個舉動即刻引發韓國政壇軒然大波，亦震驚咗全世界。不過，韓國國民冇被嚇怕，反而齊心合力，以非暴力嘅方式聚集到國會外面，阻擋戒嚴部隊嘅軍車進入。最終，國會喺短短幾個鐘頭內就推翻咗呢個戒嚴令，尹錫悅被迫解除命令並公開道歉，但亦隨即面臨彈劾同內亂罪嘅審訊，最後落台。

李在明喺今日嘅「光之革命一周年對國民特別聲明」中提到：「舊年嘅政變，反而成為一個機會，畀我哋向世界宣示大韓民國民主主義驚人嘅恢復力。政變一發生，國民毫不猶豫就奔向國會，佢哋（政變者）極度不義，但我哋嘅國民極為正義。」

李在明話，為咗紀念國民偉大嘅勇氣同義舉，政府決定將十二月三號訂為「國民主權日」，並將佢升格做法定公眾假期。佢認為，咁樣做至緊要係可以確保國民「一年至少可以回顧呢日一次」，銘記國民先係國家嘅真正主人。

李在明同時強調，「光之革命」仲未完，針對策劃內亂嘅相關人士嘅調查同審判仍然喺度進行。佢直斥：「為咗一己私利而破壞憲政秩序，甚至策動戰爭嘅無道行為，必須受到審判。」佢誓言會將韓國打造成一個任何人都唔可以威脅主權嘅國家體制。