《信報》昨（3日）發表標題為「黃碧嬌高調反擊 民建聯有苦難言」嘅評論文章，指大埔宏福苑五級奪命大火震撼全港，政治風波越演越烈，矛頭直指前任宏福苑業主立案法團顧問、民建聯資深區議員黃碧嬌。

評論指，呢位政壇有超過廿年資歷嘅「民記」女將，近日不停畀網民狙擊，指控佢當年大力支持上屆法團拍板通過嘅「天價維修工程」，正係導致今次慘劇嘅主因之一。一直潛水避開風頭嘅黃碧嬌，忽然高調發聲明，表明自己會親自去警方同廉署報案，要求徹查現屆法團係咪涉及瀆職、隱瞞安全風險甚至貪污，巧合嘅係，現屆法團啱啱好就係舊年帶頭成功罷免上屆法團嘅一批人。

評論指，黃碧嬌將聲明擺上Facebook，雖然即刻熄咗留言功能，但短短幾個鐘內已經有幾千個網民畀「嬲嬲」，可以話係直接「吸嬲」指數爆棚，進一步激起民憤。信報引述多個民建聯中人講法，現時仍未有實質證據證明黃碧嬌直接同大火有責任，黨內原本都冇打算同佢割席，希望慢慢等事件降溫，不過黃碧嬌今次自己選擇高調出招，迫使黨內高層「冇得揀」，只能硬食。

評論又提到，宏福苑現任法團主席徐滿柑日前接受訪問，曾經呼籲大家唔好再散播仇恨，更暗示唔好未審先判「某位黃姓議員」，本嚟係可以為事件降溫，但黃碧嬌似乎「完全唔領情」，當日下午隨即大力炮轟現屆法團，錯過咗一次停戰嘅機會。

有建制中人苦笑話，徐滿柑嘅一番說話，原本令事件有轉向理性客觀討論嘅契機，但「嬌姐可能冇睇新聞」，白白錯過「停戰」機會。評論亦提到，保安局局長鄧炳強回應事件時，語帶保留，強調無論係現屆定上屆法團，只要有證據顯示違法，都一定依法辦事。

《信報》認為，民建聯嘅態度同樣耐人尋味，佢哋日前發咗個嚴正聲明，話一旦證實黨內任何人包括黃碧嬌涉及違法，一定絕不姑息，又呼籲各界喺調查結果出嚟之前，保持理性客觀。黨內成員私下透露，嬌姐作為資深黨員，民建聯暫時唔會同佢切割，黨嘅立場始終係全面配合調查，以光明磊落嘅態度畀支持者一個交代；但都有成員話，事件未清楚之前，黨內最好唔好跟得太貼，避免捲入政治漩渦。

評論提到，有同區地區人士分析，火災發生後，臨近立法會選舉，民情必然受到影響，選民投票嘅熱情可能會降低，影響投票率。問到民建聯主席陳克勤喺當區嘅選情會唔會受影響，該人士直言，陳克勤核心嘅樁腳票仍然穩陣，但肯定少咗啲原本有機會爭取嘅新票源。

評論最後指，至於會唔會有其他候選人藉呢次事件打反民建聯嘅牌去搶票，佢話呢種打法已經唔符合現時新時代政治嘅「劇情需要」。