綜合星島、香港01報導，大埔宏福苑五級奪命大火造成逾百人死亡，今日（1日）踏入第六日。警方同消防今日繼續喺現場展開調查，災難遇害者辨認組（DVIU）人員再度上樓搜索，消防亦一直喺場內戒備射水，防止餘火復燃。

緊鄰火場嘅廣福休憩處已經成為市民悼念死者嘅主要聚集點。昨日適逢假期，前來獻花嘅市民絡繹不絕，人龍一度延綿超過一公里，整個休憩處被大量花束堆滿，宛如一片花海。

今日凌晨約2點，多名民安隊人員聯同十多位熱心街坊，趁夜深獻花人流減少，協助整理同清走部分已受損花束，為今日繼續而來嘅悼念市民騰出更多位置。今朝更有市民跪地上香拜祭，亦有人貼上手寫心意字貼、放上毛公仔，悼念在大火中喪生嘅幼童，同場氣氛凝重哀傷。

除咗大埔區內嘅花店提供免費白花俾市民悼念，香港多區花店都有同樣做法。其中以賣花聞名嘅旺角太子花墟，大部分花店昨日起都向市民免費奉上鮮花。有花店東主表示，希望市民將原本買花嘅錢捐俾受災居民；若有市民堅持俾錢，花店亦承諾會將全部款項轉捐災民，盡一分力。

其中一名在大火中遇難嘅伯母，其英勇事跡昨日喺網上引起廣泛轉載。死者家屬喺帖文中透露，伯母當時正準備逃生，但仍不忘逐家逐戶拍門叫齊鄰居走火警，最後因為多留咗幾分鐘，而錯失咗自己嘅逃生機會。

家屬痛心寫道：「佢用自己條命，換取4人1狗嘅生命，佢係貫徹佢做人嘅宗旨。我心情好複雜、傷心、難過，但我相信，佢喺嗰一刻嘅決定，佢係無悔嘅。」家屬又引述逃生嘅街坊表示，伯母喺聽到通知後冇即刻離開，而係喺17樓逐家逐戶拍門提醒鄰居走難。其後佢返返屋企，卻最終不幸罹難。

帖文刊出後，大批網民留言送上慰問，希望家屬節哀，並向伯母嘅英勇行為致敬：「RIP偉大嘅伯母，你彰顯咗人性嘅光輝。」、「Auntie生死關頭仲係勇敢救人，雖然佢離開咗你哋，但要以佢為榮，願佢安息。」、「好偉大，如果佢未拍晒門就走，可能即使逃出生天，佢一世都唔安心。」、「RIP，多謝姨姨犧牲自己拯救其他人，好勇敢，一路好走！喊到癲！」、「大家都要繼續好好生活，加油。」