香港01報導，大埔宏福苑宏昌閣日前（26 日）發生五級大火，火勢猛烈，全座被焚毀得面目全非，係本港近百年最嚴重嘅火警災難。大火發生後，區內街坊、義工連日自發到現場以及多個臨時庇護中心分派物資，協助受影響居民。不過，一段關於「關愛隊」嘅片段同圖片就喺網上瘋傳，惹起極大公憤。有網民拍到多名關愛隊成員喺災民物資區內排成一行影合照，被質疑「打卡」多於協助居民。同時，政府高層對火警原因嘅說法亦引起爭議。政務司司長陳國基昨日（27 日）接受訪問時提到，發展局已與業界商討，計劃以金屬棚架全面取代傳統竹棚，強調金屬較耐燃。唔少網民質疑官方試圖將焦點放喺棚架物料，而非真正導火線。

有目擊者指，關愛隊到場後只繞場一圈，影完相就離開，實際上並無參與任何支援工作。現場市民同義工批評，災難當前，部分人竟利用場面做表面工夫，行為令人難以接受。歌手吳林峰見到有關片段亦忍唔住喺社交平台發火，直斥：「痴 X 線！呢啲行為根本同幸災樂禍冇分別！」佢其後連出多個限時動態，怒氣未消，直言關愛隊嘅所作所為「完全唔係幫手，只係做樣」。

吳林峰亦就此發文，怒斥：「點解無啦啦去到棚架係咩物料？首先今次係人禍唔係棚架禍！」佢指屋苑維修工程長期被指管理混亂、好多安全程序被忽略，「唔係因為竹棚，而係有人包庇、有人搵利益，所有嘢都 HEA 做，慳到最盡！」佢指居民幾百萬嘅維修費照俾，但管理同監管卻一塌糊塗，結果有關人士先攞咗利益，出事嘅就係普羅市民。

唔少網民同市民心裏亦明白，今次大火會喺短時間內迅速吞噬整座大廈，主要原因之一係未使用阻燃安全網，加上棚網密封包圍大廈外牆，火勢以極高速度蔓延到相鄰多幢樓宇，因此對「竹棚」嘅指控被質疑有轉移視線之嫌。吳林峰喺貼文中再度炮轟：「人命唔理，消防拎命衝入去都唔講，市民心痛都唔理，居然將問題話成係用咩棚架？有冇良心？仲要害埋成個行業。」

佢指物料當然有關係，但唔應該用嚟分散大眾注意力，「唔好畀人帶風向，等有責任嘅人搵到位走甩！」佢呼籲市民「心水清啲」，唔好被轉移焦點，並提醒大家專注喺幫助受災居民、消防同醫護。佢話：「發生呢件事，人人心入面都唔好受，大家記住照顧好身邊人，搵到方法可以就盡一分力幫下受害者，唔好畀啲唔關事嘅講法搞亂你個心。」

事後吳林峰再發文解釋，強調唔想俾人誤會自己想「抽水」：「懇求大家唔好誤會，我唔係想型，也唔係想攞彩，係真係睇完訪問嬲到忍唔住！唔講，我驚自己爆血管。」佢指自己作為公眾人物，見到有人以災難做政治表演，難以噤聲。網上亦有大批市民留言支持吳林峰嘅說法，形容佢講出咗「市民心聲」。有人表示，火警喺短時間內迅速變成群死事件，屋苑多項安全問題早已見報多年，包括棚架管理、未使用阻燃網、消防通道被佔用等，卻從無被正視。亦有人憤怒表示：「而家先講竹棚，係想搵替死鬼？」