《華爾街日報》引述知情人士報導，美國總統特朗普於25日致電日本首相高市早苗時，建議高市應軟化關於台灣問題嘅發言語氣，避免刺激北京。不過特朗普亦表示理解高市早苗面對嘅國內政治限制，唔會要求佢收回關於「台灣有事」嘅言論。

事情起因係高市早苗近日發表言論，話中國一旦攻擊台灣，日本可能會作出軍事回應，呢番言論即刻惹怒咗中國。幾日之後，習近平喺一次同特朗普為時一個鐘嘅電話通話入面，足足用咗半個鐘強調中國對台灣嘅歷史主權，並且表明中美兩國共同負責管理國際秩序。

同習近平通完電話後，特朗普就打電話畀高市早苗，勸佢喺台灣主權問題上唔好挑釁北京。日本官員同一名知情美方人士表示，特朗普嘅建議好委婉，並無迫使高市收回言論。日本官員對特朗普嘅信息感到擔憂，認為特朗普總統唔想因為台灣問題，而破壞近期同習近平達成嘅緩和關係，其中包括中國承諾向受貿易戰影響嘅美國農民大量購買農產品。

白宮喺被問到呢次交流嘅時候，向《華爾街日報》發出特朗普嘅聲明：「美國同中國嘅關係非常好，對於我哋親密嘅盟友日本嚟講亦都係一件好事。美中兩國能夠相處融洽，對中國同美國都有好處。我相信習近平主席會大幅增加對大豆同其他農產品嘅採購，對我哋嘅農民有益就係對我有益。」特朗普仲補充：「我哋同日本、中國、南韓同好多其他國家簽署咗好好嘅貿易協議，世界正處於和平狀態，我哋應該繼續保持落去！」而日本首相辦公室就拒絕評論《華爾街日報》嘅報導。

《華爾街日報》 認為，今次事件凸顯咗美中關係嘅新現實，中美貿易停火同台灣問題已經變得密不可分，特朗普同習近平準備出席明年幾場會議。美國嘅一中政策係「認知」（acknowledge)但唔支持北京對台灣嘅主權聲索，而且華府一直向台灣提供防衛武器，以確保台灣嘅未來唔會受到中國武力嘅決定。

《華爾街日報》 指出，特朗普一向讚揚高市早苗喺國防問題上嘅強硬立場，之前更加喺日本橫須賀市一艘美軍航母上同佢舉辦聯合活動，展現兩國盟友嘅關係。但高市嘅言論喺特朗普同習近平改善關係嘅敏感時刻，激怒咗習近平。高市早苗喺11月7日向國會議員發言時警告，如果中國攻擊台灣，日本可能同其他國家一齊出兵。呢番言論引起北京嘅強烈反擊，包括經濟同外交報復措施，甚至有中國外交官喺社交媒體上威脅要將高市早苗斬首。

特朗普致電高市早苗反映出中國官方喺中美元首通話中高度關注台灣議題。根據中方嘅會後聲明，習近平話畀特朗普聽：「台灣回歸中國係戰後國際秩序嘅重要部分。」美方知情人士表示，特朗普喺電話中建議高市早苗調和一下關於台灣問題嘅語氣，特朗普亦了解高市喺日本國內政治上嘅限制，明白佢唔能夠完全收回激怒北京嘅言論。

至於東京嘅立場就認為，高市早苗只係假設性地表述日本長期政策，儘管作為現任首相咁具體表達，係非常罕見。特朗普星期二晚向記者表示，佢同高市早苗「有一次好好嘅談話」，佢又話：「我哋嘅關係非常好。佢非常聰明，亦都非常強勢，佢將會成為一位出色嘅領袖。」