日本執政黨自由民主黨正準備喺國家安全戰略檢討中，正式討論應否廢除自1971年起奉行嘅「非核三原則」（唔擁有、唔製造、唔引進核武器）。消息一出，無論喺日本國內抑或國際社會，都引起強烈震盪。作為全球唯一曾遭受核武攻擊嘅國家，日本喺二戰結束80周年呢個高度象徵性時點討論相關議題，被外界視為戰後和平憲法體制同反核國策可能出現重大轉折。

現任首相高市早苗11月11日喺國會委員會被問及政府係咪仍然堅持非核三原則時，罕有地拒絕作出明確回應，只表示「會喺戰略檢討中通盤考量」。幾日後，自民黨政務調查會長小林鷹之喺11月20日公開表示，「作為執政黨，我哋有責任打破禁忌、進行無限制討論」，並確認非核三原則已正式列入預計喺明年4月底前完成嘅國家安全戰略修訂議題清單。

相關表態即時喺日本社會引發爭議。獲得2024年諾貝爾和平獎嘅日本原水爆被害者團體協議會（日本被團）同日發表聲明，強烈譴責任何試圖推翻非核三原則嘅行為。92歲核爆倖存者田中照美接受共同社訪問時情緒激動表示：「核武器係惡魔嘅工具，廣島、長崎嘅教訓絕對唔可以被遺忘，無論如何都唔能夠讓核武進入日本國土，或者令日本再一次成為核戰目標。」

國際廢除核武器運動（ICAN）共同主席、同時亦係日本非政府組織「和平船」資深成員嘅川崎哲向本台表示，對政府竟然公開討論廢除非核三原則感到極度震驚。他指出，呢項原則早已成為日本社會嘅全國共識，歷任首相每年8月出席廣島、長崎和平紀念活動時，均會重申相關承諾。川崎哲又強調，過去十年多項民意調查顯示，即使喺地緣政治局勢惡化之下，仍然約有七成日本民眾支持維持非核三原則。

在野政黨方面亦態度強硬。立憲民主黨黨魁野田佳彥喺11月中旬召開記者會，明確承諾將全力阻止任何改變非核三原則嘅企圖，並重申「日本應繼續站喺前線，推動全球廢除核武，而唔係背棄自己嘅歷史同承諾」。

主流傳媒亦發出警告。《每日新聞》19日社論指出，若因個人意識形態而強行推動相關修訂，將令日本作為和平國家嘅道路出現嚴重倒退，並喺國際社會留下難以抹去嘅負面印象。社論承認，俄羅斯入侵烏克蘭、北韓加速發展核武，以及中國軍事壓力上升，確實令日本安全環境轉趨惡化，但同時強調，放棄長年反核理念，等同抹殺日本數十年努力，亦會令周邊國家產生深刻疑慮。

多名國際學者同樣敲響警鐘。澳洲墨爾本大學教授、國際防止核戰爭醫師組織（IPPNW）共同主席拉夫接受本台訪問時指出，日本長期倚賴美國「核保護傘」，對美軍是否喺日本本土或軍艦搭載核武，過去一直採取「不問、不說」政策，實際上已屬默許狀態；但如果日本轉為自行發展核武，將會係「質變式嘅飛躍」。佢警告，相關行為可能徹底破壞東北亞穩定，誘發南韓等國跟進發展核武，形成連鎖擴散效應，進一步推高區域軍備競賽風險。拉夫同時指出，日本社會因曾親身經歷核爆，對核武一直存有根深蒂固嘅反感同高度敏感。

目前正值東北亞局勢高度緊張之際。日本防衛大臣小泉進次郎11月23日親赴距離台灣僅約110公里嘅與那國島，視察新一代中程地對空飛彈部署情況，中國外交部隨即指責日本「製造區域緊張、挑起軍事對抗」。另一方面，高市早苗早前公開表示，「中國若武統台灣，將構成日本存亡危機」，令本已緊繃嘅中日關係進一步惡化。

分析人士認為，自民黨選擇喺呢個時間點重提非核三原則，除咗回應國內保守派長期主張嘅「自主核威懾」之外，亦同美國特朗普政府上台後，華盛頓對亞太盟友嘅「核共享」政策取態變得曖昧有關。