近排內地學校體檢中嘅「抽血」項目，成為好多家長心中嘅一大憂慮。喺呢種極度不信任嘅氣氛下，廣州海珠區一間小學爆出醜聞，竟然以「秘密任務」嘅名義騙學生去抽血，惹到家長群起激憤，有家長怒問學校點解要咁鬼鬼祟祟，更有人狠批「誰抽我女兒血，我砍誰」。

根據內地媒體報道，呢件事係喺今個月6號發生，廣州海珠區一間民辦小學未經監護人同意，就安排一年級新生做抽血檢查。更加駭人聽聞嘅係，涉事班主任居然同學生講，抽血係「秘密任務」，並威脅學生如果話畀屋企人知，就會扣除「小紅花」嘅獎勵。

家長之後聽返子女講被抽血，個個震驚同嬲爆，喺微信群組集體抗議，有家長激動到直接斥責校方「書不好好教，搞抽血幹嘛？」甚至更加激動爆粗話：「誰抽我女兒血，我砍誰，班主任死，校長死」。

家長追問之下，涉事嘅班主任竟然玩「潛水」，即刻關機迴避問題。學校負責人則推卸責任，聲稱抽血係「海珠區教育局統一要求」，更將無通知家長嘅責任推落「部分班主任工作疏忽」度。教育局之後出面表態會徹查，承認抽血必須事先獲監護人知情同意，但調查結果到而家仍未有公開，網上嘅輿論亦被強力壓制。

家長嘅激烈反應絕對唔係小題大做。近年以嚟，學校愈嚟愈積極安排「免費抽血體檢」，有家長更加爆料話子女一次被抽咗「兩大管血」，遠遠超出正常檢查需要嘅份量。

唔只係廣州，廣東東莞都傳出，根據《東衛函2025 80號文件》，安排全市學生進行年度體檢，檢查項目包括血常規、肝功能抽血、視力、口腔同內外科等等。雖然體檢嘅費用係由學校支付，但如果家長不同意自己子女抽血，就必須書面解釋原因。有網友質疑：「我們小時候從來不用抽血，為何如今的孩子一年要抽一次？」

其實呢種對抽血體檢嘅恐懼，絕非個別現象。有報道指出，網上已經流傳大量訊息，家長集體抵制呢類體檢，甚至有人爆料話有學校通知抽血嗰日，竟然發生「全班同學齊齊請假」嘅奇景，家長紛紛以「細路仔發燒」、「唔舒服」為理由，避免子女參與抽血體檢。另外喺一間幼稚園嘅家長群組入面，家長更加直接表態「不做體檢」、「不抽血」、「一切要查血的檢查都不做」。