美國總統特朗普再次語出驚人，上星期五（11月14日）喺「空軍一號」上接受訪問時，因不滿《彭博社》女記者露西（Catherine Lucey）追問已故富豪愛潑斯坦（Jeffrey Epstein）嘅「淫魔檔案」電郵內容，竟然當眾指住對方鼻尖，大聲喝斥「收聲，豬仔！」（Quiet, Piggy）。事件引爆美國新聞界公憤，多個媒體人齊聲聲討。不過，最令人側目嘅係，白宮新聞秘書李威特（Karoline Leavitt）非但無就總統嘅侮辱性言論道歉，反而「護主」解釋，話特朗普呢種作風正正體現咗佢嘅「坦率與透明度」，仲話美國選民就係因為佢夠直率先會再選佢。呢種「硬拗」嘅回應，令輿論一片嘩然。

事發喺上星期五，特朗普坐「空軍一號」由華盛頓飛去佛羅里達州海湖莊園期間，喺機上接受隨行記者嘅簡短訪問。當時民主黨眾議院監督委員會啱啱公開咗幾封涉及愛潑斯坦案件嘅電郵，內容被指可能對特朗普不利。

《彭博社》嘅白宮記者露西就事件向特朗普追擊，問佢：「如果文件入面無啲咩不利內容，點解你會咁大反應？」

露西嘅提問即刻辣著特朗普，佢當場面露不悅，用手指篤住露西，大聲叫佢「收聲」（Quiet），然後再補多句侮辱性嘅「豬仔！」（Piggy）。現場片段曝光後，呢種公然侮辱女性記者嘅行為，即時引起巨大爭議。

特朗普嘅言論即刻觸動新聞界嘅神經。美國有線電視新聞網（CNN）主播塔珀（Jake Tapper）喺社交平台「X」度轉載咗相關片段，狠批事件「令人作嘔，完全不可接受」。前福斯新聞主播卡爾遜（Gretchen Carlson）都出聲譴責，形容呢種侮辱係「令人反感且具有侮辱性」。美國專業記者協會（SPJ）亦發聲明，強調針對女性記者嘅羞辱性言語「唔應該被容忍」，又警告呢種敵意行為會削弱新聞自由，阻礙記者追問涉及公眾利益嘅議題。

《彭博社》方面亦發聲明反擊，重申佢哋嘅白宮記者團隊「秉持公正無畏嘅態度提出問題」，工作係重要嘅公共服務，並會「繼續專注以公正與準確為原則處理公共議題」。

面對四方八面嘅批評，白宮方面非但無道歉，反而幫口護航。白宮新聞秘書李威特喺例行記者會上，為咗特朗普辯護，搬出佢「坦率」嘅風格。佢話，美國選民就係欣賞特朗普夠直接、坦率，先會選佢做總統。

李威特更進一步指控記者散播假新聞，話特朗普「睇到假新聞就會揭露，對於散播虛假信息嘅記者，佢會覺得好失望」，但佢就無提出過露西當時提出嘅係邊啲「假新聞」。

佢仲反過來要記者多謝特朗普：「佢向媒體提供咗前所未有嘅接觸機會，差唔多日日都會回應提問。佢選擇當面坦率表達，而唔係收埋自己，呢個其實更尊重新聞自由。」

有評論就一針見血咁指出，白宮嘅講法根本係「無稽之談」，形容特朗普嘅行為就好似「古惑仔」咁，完全唔符合一個國家元首應有嘅莊重同風範。資深白宮記者黎恩（April Ryan）喺接受訪問時更話：「美國總統應該係道德領袖、國家嘅領導者，而佢家陣嘅行為就好似個街頭流氓咁。」佢又質疑，特朗普咁惱羞成怒，可能正正反映愛潑斯坦檔案入面真係「有啲嘢」。