英國政府日前再度宣布大幅收緊移民政策，新方案下申請永久居留（俗稱永居）嘅一般門檻將會大幅提升，由現時合法居住5年，延長至最少10年，甚至有個別類別最多延長到20年。不過，英國內政部隨即確認，現時適用於BNO港人嘅「5+1」入籍方案就暫時不變，意味住緊英國嘅BNO持有人，仍然只需要合法居住滿5年，就可以申請永居，再居住1年便可申請正式入籍英國。內政部亦特別強調，英國政府將繼續支持來自香港嘅移民，肯定港人過去對英國社會已作出重要貢獻，未來亦將繼續扮演積極角色。

根據英國內政部最新估計，未來兩年將出現BNO港人申請永居嘅歷史性高峰。當中，預計2026年將有約9萬2千名持BNO簽證嘅港人正式達到申請永居資格，呢個數字係史上最高。而去到2027年，符合申請永居資格嘅港人仍將維持喺約5萬4千人左右，之後嘅數目才會逐步回落。整體而言，2026年至2030年間，英政府預測將會有接近19萬5千名持有BNO簽證嘅港人合資格申請並獲得永久居留資格。

值得注意嘅係，雖然政府仍然維持「5+1」安排嘅5年居住要求，但同時公佈嘅新文件卻大幅提升咗申請永居嘅整體難度，尤其喺語言、收入及稅務方面，條件將明顯更為苛刻。從2026年開始，所有申請永居嘅港人必須滿足以下嘅新要求：

一、英文能力大幅提升：B1跳級至B2

語言要求由目前嘅B1級（約等於GCSE英語，即中學畢業程度）提升至B2級。新要求下嘅B2級英文能力大致相當於英國A-level嘅程度，並且需要考核讀寫聽講四大範疇，考試難度比現時只需與考官對答嘅B1大幅增加，申請人必須證明英文水平足以應付日常生活及職場。

二、收入條件：最少年薪12,570鎊並有報稅紀錄

新規定下，所有申請永居人士，必須喺過去3至5年期間，每年收入最少達12,570英鎊（約12萬8千港元），呢個金額剛好相當於英國現時個人免稅額水平。此外，申請人亦必須提交報稅證明以及有繳納國民保險（NI）嘅紀錄。

現時未見BNO簽證人士可獲得任何豁免或優惠待遇，而文件亦未有清晰交代家庭主婦、無收入人士可否用家庭總入息計算，令部分家庭可能需要面對更大壓力。

三、無刑事紀錄、訴訟或官非（現有要求）

四、無欠NHS或政府財務紀錄（現有要求）

五、必須通過Life in the UK測試（現有要求），即必須通過對英國歷史文化、生活常識嘅專門測試，呢一項現時已經係強制性規定。

2019年「反送中」運動爆發，隨後2020年北京喺香港強行實施《港區國安法》，引發大量港人對政治自由及個人安全嘅憂慮。英國政府喺2021年推出BNO「5+1」移民措施，向持有BNO嘅港人提供快速移民途徑，亦因此引起北京強烈不滿，多次公開批評英國政府插手香港事務，導致中英兩國外交關係急速惡化，雙方長期處於僵局狀態。